सुनसरी, चैत १०
सुनसरीको दुहबी नगरपालिकाकी उपमेयर सुनिता दाहाल साहले आफनै वडा अध्यक्ष र सदस्यमाथि हातपात गरेकी छन । स्थानीयस्तरका विवाद मिलाउने न्यायिक समितिको संयोजक समेत रहने उपमेयर साहले दुहबी नगरपालिका ५ नं वडाका वडा अध्यक्ष तथा सदस्यलाई कुटपिट गरेकी हुन ।
५ नं वडामा रहेको सरस्वती उच्च मा.बि खेल मैदानको निर्माण सम्बन्धि अनुगमनको गरिदिन भन्दै नगरपालिका पुगेका वडा अध्यक्ष रमेश रौनियार र सदस्य कृष्ण तामाङमाथि नगरपालिका प्रागणमै कुटपिट भएको हो ।
खेल मैदानको निर्माण सम्पन्न भइसकेको र अनुगमन गरेर बजेट फर्साेटको प्रकृया शुरु गरिदिन भनेपछि दुवै पक्ष बिच शुरुमा बिवाद उत्पन्न भएको थियो । पछि उपमेयर साहले आफना श्रीमान सुनिल साहलाई बोलाएर आफुहरुलाई कुटपिट गरेको वडा सदस्य तामाङले बताए ।
निर्माण सम्बन्धिको फायल समेत उपमेयरले नियन्त्रणमा लिइ बिकास निर्माणको कामलाई रोकेको वडा अध्यक्ष रमेश रौनियाले बताए । कुटपिट पछि आक्रोशित सर्वसाधरणले दुहबी नगरपालिका दिनभर घेराउ गरेका थिए ।
यता घटनाको बिषयमा जानकारी दिदै मेयर बेद गच्छदारले शुरुमा कुटपिट नभइ सामान्य विवाद मात्र भएको बताएका थिए । पछि कुटपिट गरेको भिडियो नै सार्वजनिक भएपछि जनप्रतिनिधिले हात हाल्नु गल्ती भएको उनले स्वीकार गरे ।
