२० वैशाख, काठमाडौं ।
लकडाउनका कारण नेपालमा अलपत्र परेका ५४ देशका ३ सय ३ नागरिक शनिबार १ बजे काठमाडौंबाट कतार एयरवेजको वाइडबडी विमानमा पेरिस फर्केका छन् ।
काठमाडौंस्थित कतार एयरवेजका एक अधिकारीका अनुसार नेपालमा रहेको फ्रान्सेली दूतावासले चार्टर गरेको यो उडान दोहाबाट सोझै पेरिस जाने छ । ‘दोहामा एक घन्टा इन्धन थप्ने, क्याटरिङ र सरसफाइ गरेर फेरि यही जहाज पेरिससम्मै पुग्ने छ,’ ती अधिकारीले भने ।
यसमा युरोप तथा दक्षिण अफ्रिका, इजरायल, अमेरिका र क्यानडा लगायतका देशका नागरिक छन् । जसमध्ये ३ सय ३ यात्रुसहित ४ शिशु पनि छन् । लकडाउनयता कतार एयरवेजले नेपालका लागि ११ वटा चार्टर उडान गरीसकेको छ ।
यो उडानमा रहेका यात्रुहरुले टिकटका लागि आफै रकम जुटाएका छन् भने फ्रान्स सरकारले केही रकम अनुदान पनि दिएको ती अधिकारीले बताए ।
