५ जेठ,विराटनगर ।
विराटनगरका औषधि व्यवसायी देवी प्रसाद दुलालको हत्यामा उनकै श्रीमतीको संलग्नता रहेको खुलेको छ ।
इटहरी–१२ खनार घर भई विराटनगर १०स्थित मधुमारामा देवी माँ पाथीभरा फर्मा नामक औषधि पसल सञ्चालन गर्दै आएका दुलालको हत्यामा संलग्न श्रीमती सहित ३ जनालाई प्रहरीले पक्राउगरि सार्वजनिक गरेको छ । जिल्ला प्रहरी कार्यालय मोरङले सोमबार डिजिटल प्रेस मिट गरी घटनामा संलग्न रहेको आरोपमा पक्राउ परेकी मृतक देवी प्रसाद दुलालकी श्रीमती मीना श्रेष्ठ दुलाल, सिराहाको लहान नगरपालिका–१० पडहरिया टोल घर भई हाल विराटनगर–४ स्थित बुढाथोकी फार्मेसीमा काम गर्ने २१ वर्षीय ब्रहमदेव साह र इटहरी–१२ बस्ने निर्मल साहका छोरा २० वर्षीय सोनु साहलाई सार्वजनिक गरेको हो ।
३३ वर्षीय दुलालको आइतबार बिहान विराटनगरस्थित शंकास्पद मृत्यु भएको थियो ।आइतबार बिहान रातको ३ बजे देवीप्रसाद दुलाललाई उपचारको लागि विराटनगर गोल्डेन अस्पताल र्पुयाउदा निजको मृत्यू भएको र शव शंकास्पद् रहेको भनी जिल्ला प्रहरी कार्यालय मोरङमा जानकारी भए पश्चात प्रदेश १ को अनुसन्धान समुह र जिल्ला प्रहरी कार्यालय मोरङले अनुसन्धान थालेको थियो । पछिल्लो समय श्रीमान श्रीमतीको राम्रो सम्बन्ध नभएकोले दुलालको देवी पाथीभरा फार्मेसीमा स्टाफकोरुपमा बिगत ४ बर्ष अगाडी देखी काम गर्ने ब्रम्हदेवसँग मिली श्रीमतीले योजना बनाएर श्रीमानको हत्या गरेको खुलेको जिल्ला प्रहरी कार्यालय मोरङका एसपी विश्व अधिकारीले जानकारी दिए ।
शनिबार रातको साढे १० बजे ब्रह्मदेव साह र सोनु साह मृतक देवी प्रसाद दुलालको डेरा कोठामा आएपश्चात दुलालकी श्रीमतीले ढोका खोलेर दुवै जनालाई घरमाथि पठाएको र सोही रात करिव ११ बजे देवीप्रसाद दुलाललाई सुतेको अवस्थामा उनीहरूले पन्जा लगाई डोरीले घाँटीमा बाँधी मारेको खुल्न आएको उनले बताए । दुलालको मृत्यु पश्चात बिहानको साढे २ बजे श्रीमती मीना श्रेष्ठ दुलालले छिमेकी, घरबेटी र धनबहादुर काफ्लेलाई आफ्नो श्रीमान अचेत अवस्थामा रहेको भनी सम्पर्क गरी बोलाएर उपचारको लागी गोल्डेन अस्पताल लगेको देखिएको एसपी अधिकारीले बताए ।
ब्रम्हदेव साह दुलालकै फार्मेसीमा सात महिना अघि सम्म काम गरेको र उनलाई श्रीमानले निकालेको खुलेको छ । साह र दुलालकी श्रीमतीबीच प्रेम सम्बन्ध रहेको हुन सक्ने भएपनि खुलि नसकेको एसपी अधिकारीले बताए । प्रहरीले घटनास्थलबाट मोवाईल ४ थान,प्रयोग भएको सिमकार्ड ८ थान, एयलमक पाउडरको बट्टा, कपडाको ब्याण्डेज,नाइलनको डोरी २ थान, सर्जिकल पन्जा ८ जोर, घटनास्थलबाट उठएको रगत लागेको बेडकभर, सिरानीको खोल,ब्लयाङकेको टुक्रा, चुडिएको सिक्री बरामद गरेको छ । पक्राउ प्रतिवादीहरूलाई कर्तब्य ज्यान मुद्दा अन्तर्गत थप अनुसन्धान कारवाही भईरहेको जिल्ला प्रहरी कार्यालय मोरङले जनाएको छ ।दुलालका ८ वर्षीय छोरा रहेका छन् ।
