५ जेठ, वासिङ्टन ।
अमेरिकी राष्ट्रपति डोनाल्ड ट्रम्पले अमेरिकामा कोरोना भाइरसका सङ्क्रमितहरूको सङ्ख्या घटेको बताएका छन् । उनले शनिबार कोरोना भाइरसका सङ्क्रमितहरूको सङ्ख्यामा उल्लेख्य रुपमा घटेको भएको जानकारी दिएका हुन्।
राष्ट्रपति ट्रम्पले भनेका छन्- अमेरिकाभरमा कोरोना भाइरसको सङ्क्रमण दरमा उल्लेख्य मात्रामा कमी आएको छ, यसबाट थोरै भए पनि आशा जागेको छ । उनले शनिबार आफ्नो ट्विटर अकाउन्टमा लेखेका छन् – यो धेरै राम्रो समाचार हो कि अमेरिकाभरमा कोरोना भाइरसको सङ्क्रमणमा कमी आएको छ ।
अमेरिकाको जोन हप्किन्स विश्वविद्यालयले जनाएअनुसार त्यहाँ १४ लाख ८६ हजार ४२३ जना सङ्क्रमित छन् । साथै यहाँ ८९ हजार ५५० जनाको ज्यान गएको छ । अप्रिलमा अमेरिकामा दैनिक कम्तीमा ३६ हजार जना सङ्क्रमित हुने गरेकोमा अहिले भने त्यसमा उल्लेख्य कमी आएको बताइएको छ । रासस/एएनआई
