८ जेष्ठ, दार्चुला । दार्चुलाबाट नेपाल–भारत जोड्ने सिमामा रहेको पुल आज बिहीबार केही समयका लागि खोलिएको छ ।
लकडाउनले बेंसीमै अड्किएका व्यासी सौका समुदायलाई कुन्चा (बसाइँ) सर्न दिने, सीमापारि रहेका नेपालीलाई भित्र्याउने र दार्चुलामा रहेका भारतीयलाई उनीहरूको देश फर्काउने उद्देश्यले केही समयका लागि नाका खोलिएको हो ।
पहिले कुन्चा, त्यसपछि भारतीय नागरिक पठाउने र अन्तिममा नेपाली नागरिकलाई नेपाल ल्याइने कार्यतालिका छ ।
व्यास गाउँपालिका–१ का सौका समुदाय स्वदेशबाट बाटो नहुँदा भारत हुँदै तीन–चार दिन हिँडेर थातथलो फर्कनुपर्छ । व्यासी सौकालाई बसाइँ सर्न र नेपाल–भारतमा रोकिएका नागरिकलाई आ–आफ्नो देश फर्काउन दुवै देशका स्थानीय प्रशासनको समन्वयमा केही बेर खलंगास्थित अन्तर्रा्ष्ट्रिय नाका खोलिएको सहायक प्रजिअ टेकसिंह कुँवरले बताए ।
चैत अन्तिमदेखि वैशाख पहिलो सातासम्म व्यास पुगिसक्ने कुन्चा यस वर्ष लकडाउनका कारण बेंसीमै रोकिएको थियो । चिसो मौसममा बस्ने पशुचौपाया हिमाली क्षेत्र जान नपाउँदा केही बेंसीमै गर्मीले मरेका थिए ।
भारतीय नागरिकसमेत नेपालमा रोकिएकाले भारतीय प्रशासन पनि नाका खोल्न सहमत भएको हो । दार्चुला सदरमुकाममा ३० जना भारतीय नागरिक रहेको तथ्यांक जिल्ला प्रशासन कार्यालयसँग थियो ।
यही बेला भारतीय बजार क्षेत्र धारचुलामा रहेका नेपाली नागरिकलाई पनि नेपाल प्रवेश गराइरहेको प्रशासनले जनाएको छ ।
