१२ जेष्ठ, चितवन ।
चितवनको भरतपुर अस्पतालमा उपचाररत नवलपरासीका एकजनाको सोमबार बिहान निधन भएको छ ।
निमोनियाका बिरामी ती व्यक्तिलाई आइतबार रातिदेखि अस्पतालको आइसियूमा राखिएको थियो । बुटवलको लुम्बिनी सिटी अस्पतालले रिफर गरेका नवलपरासीको रामग्राम–५ का ४८ वर्षका ती व्यक्तिको सोमबार बिहान निधन भएको भरतपुर अस्पतालका वरिष्ठ कन्सलट्यान्ट डा. प्रमोद पौडेलले जानकारी दिएका छन् ।
उनले भने, बिरामीको अवस्था यहाँ ल्याउँदा नै गम्भीर थियो । निमोनियाका बिरामी हुन् । उनमा ज्वरो थिएन ।’ कोरोना भाइरसको महामारीको समय भएकाले संक्रमण भए–नभएको पुष्टि भएपछि मात्रै उनको शव निकालिने डा. पौडेलले जानकारी दिए ।
उनले भने, निमोनियाका बिरामी हुन् । तर पनि कोरोना भाइरसको संक्रमणसँग मिल्ने केही लक्षण देखिएमा परीक्षण गर्नु पर्ने नियम छ । सोही कारण हामी स्वाबको रिपोर्टको पर्खाईमा छौँ ।’ बुलटवलको प्रादेशिक अस्पतालमा परीक्षणका लागि स्वाब संकलन गराएको थाहा भएकाले आफूहरुले फेरि स्वाब संकलन नगरेको तर सम्बन्धित प्रयोगशालामा फोन गरेर रिपोर्ट चाँडो उपलब्ध गराउन भनेको डा. पौडेलले जानकारी दिए ।
उनी भरतपुर अस्पतालले कोरोना भाइरस संक्रमितको उपचारका लागि खडा गरेको विशेष अस्पतालका कोभिड–१९ क्लिनिकल संयोजक पनि हुन् ।
