३२ जेठ, पर्वत।
पर्वतको कुश्मा नगरपालिका वडा नं. ३ दुर्लुङमा गए राती गएको पहिरोमा पुरिएर ३ जनाको मृत्यु भएको छ भने ६ जना वेपत्ता छन् । शनिबार भीषण वर्षा सहित खसेको पहिरोले स्थानीय तुलबहादुर थापा र कमला विकको घर पुरेको थियो ।
पहिरोमा परी दुर्लुङस्थित काफलचौरका ६२ वर्षीय तुलबहादुर थापा, उनकी ५२ वर्षीया श्रीमती र १० वर्षीया नातिनीको शव बाहिर निकालिएको हो । तुलबहादुरकै परिवारका अरु तीन जना बेपत्ता छन् । त्यस्तै कमला विकसहित उनका १३ र ९ वर्षीय छोराछोरी बेपत्ता भएको वडाध्यक्ष तेज प्रसाद पाध्यायले जानकारी दिए ।
नेपाल प्रहरी, सशस्त्र र नेपाली सेनाले राति करिब २ बजेसम्म कुटो, कोदालो र फरुवाले खोस्रिए पनि अरु व्यक्तिहरुको पत्तो लाग्न सकेको थिएन । राती वर्षा भएको र अध्यारोका कारण खोजी कार्य गर्न कठिन भएकाले बिहानैदेखि नेपाल प्रहरी, नेपाली सेना र स्थानीयको सक्रियतामा खोजीकार्य जारी राखिएको अध्यक्ष पाध्याले बताए ।
जिल्ला प्रहरी कार्यालय पर्वतका प्रमुख डिएसपी विश्वराज अधिकारीले राती दुई बजेसम्म खोजी गर्दा तीन जनाको शव भेटिएका र बिहानैदेखि नेपाल प्रहरी, सशस्त्र प्रहरी, नेपाली सेना र स्थानीयको टोली उद्धारमा खटिएको जानकारी दिए । अझै केही घर पुरिएको हुनसक्ने वडाध्यक्ष पाध्यायले बताए ।
