१४ साउन, एजेन्सी ।
अमेरिकी राष्ट्रपति डोनाल्ड ट्रम्पले फेरि अप्रमाणित र जोखिमपूर्ण औषधिको पक्षमा वकालत गरेका छन् ।
विश्व स्वास्थ्य सङ्गठन (डब्लुएचओ) , स्वास्थ्य विज्ञहरुको अध्ययन तथा अनुसन्धान विपरीत अमेरिकी राष्ट्रपति ट्रम्पले कोरोना भाइरसको उपचारमा औलोविरुद्धको औषधि हाइड्रोक्सिक्लोरोक्वीनको प्रयोग गर्नु पर्ने पक्षमा वकालत गरेको बीबीसीले जनाएको छ ।
ट्रम्पले यो औषधिको प्रयोगले कोरोना भाइरसको सङ्क्रमणबाट जोगिने वा सङ्क्रमण निको हुने बताउँदै आएका छन् । तर अमेरिकाकै स्वास्थ्य विज्ञ, डब्लुएचओ तथा वैज्ञानिकहरुले यो औषधि कोरोना भाइरसविरुद्ध प्रभावकारी नहुने बताउँदै यसको प्रयोगले कोरोना भाइरसबाट सङ्क्रमित व्यक्तिमा मुटुसम्बन्धी समस्या आउन सक्ने र कतिपय अवस्थामा ज्यान पनि जान सक्ने चेतावनी दिइसकेका छन् ।
संयुक्त राज्य अमेरिकामा मात्रै झण्डै ४५ लाखमा कोरोना पुष्टि भएको छ भने एक लाख ५२ हजारभन्दा धेरैको ज्यान गएको छ ।
