१८ साउन, एजेन्सी ।
अस्ट्रेलियाको भिक्टोरिया राज्यमा कोरोना सङ्क्रमणको बढ्दो अवस्थालाई मध्यनजर गर्दै ‘आपतकालीन अवस्था’ घोषणा गरिएको छ ।
गत २४ घन्टामा सो राज्यमा ६ सय ७१ नयाँ संक्रमित थपिएका छन् । यो सङ्ख्या हिजो ३ सय ९७ रहेको थियो भने त्यसको अघिल्लो दिन अर्थात् ३१ जुलाईमा ६ सय २७ रहेको थियो । आइतबार बेलुकी ६ बजेदेखि शुरू हुने आपतकालीन अवस्थामा मेलबर्नको शहरी इलाकामा चौथो तहको लकडाउनका साथै कर्फ्यू समेत लागू हुने भिक्टोरिया राज्यका प्रिमियर डेनियल एन्ड्रूजले बताए ।
‘बेलुकी ८ बजेदेखि बिहान ५ बजेसम्म कसैलाई रेखदेख गर्ने काम गर्न वा गराउन र कामबाट आउन र जानका लागि मात्रै बाहिर निस्कन पाइनेछ । हामीले अरूलाई भेट्न जान सक्ने छैनौं । अबदेखि कोही पनि विनाकारण बाहिर निस्कन पाउने छैनन्,’ प्रिमियर एन्ड्रूजले भने ।
सो राज्यमा सुपरमार्केटमा शपिङ गर्न ६ बजेपछि केवल एक घरको एक जनालाई मात्र जाने अनुमति दिइएको छ जुन घरदेखि ५ किलोमिटरभित्र हुनुपर्नेछ । त्यसैगरी मनोरञ्जनात्मक गतिविधिहरू गर्न निषेध गरिएको छ भने बाहिर खुला स्थानमा व्यायाम दिनमा एक घन्टामात्र गर्न सकिनेछ । यी प्रतिबन्धहरू आगामी ६ हफ्ताका लागि लागू हुनेछन् ।
भिक्टोरिया राज्यमा हालसम्म ११ हजार ५ सय ५७ कोरोना सङ्क्रमित भेटिएका छन् जसमध्ये १ सय २३ जनाले ज्यान गुमाइसकेका छन् । त्यसैगरी सो राज्यका हालसम्म १६ लाख ५३ हजार भन्दा बढी कोरोना परीक्षण गरिसकिएको सरकारी तथ्याङ्क रहेको छ ।
भिक्टोरिया राज्यमा बस्ने कम्तिमा ३० जना नेपालीलाई कोरोना सङ्क्रमण भइसकेको छ । औपचारिक रूपमा नेपालीहरू कति सङ्क्रमित भए भन्ने आधिकारिक तथ्याङ्क सङ्कलन गर्ने विधि नभए पनि सामुदायिक सहयोग र राहत बाँड्ने क्रममा हालसम्म कम्तिमा ३० जना कोरोना सङ्क्रमित नेपालीहरू भेटिइसकेको एनआरएनए अस्ट्रेलियाका उपाध्यक्ष तथा भिक्टोरिया राज्यका संयोजक प्रेमप्रसाद कँडेलले जानकारी दिए ।
“अनौपचारिक रूपमा ३० जना सङ्क्रमित फेला पारिसकेका छौं । तीमध्ये १० जना होटेल क्वारेन्टाइनमा रहेका छन् । समुदायमा सङ्क्रमितहरू खुलेर अघि आउन नचाहने केही परिस्थितिलाई हेर्दा यो सङ्ख्या अझ बढी रहेको हाम्रो अनुमान छ ।
सहयोग र राहत जुटाउन एनआरएनए, न्याभ, एइसी, भिक्टोरियाको महावाणिज्यदूतको कार्यालय लगायतका सामुदायिक संघ, संस्थाहरू आवश्यक सहयोग गर्न तत्पर छौं । सहयोग चाहिएमा निर्धक्क भएर हामीलाई सम्पर्क गर्न अनुरोध पनि गर्दछु ।”, संयोजक कँडेलले भने ।
न्यूसाउथवेल्समा २४ घन्टामा १२ सङ्क्रमित थपिए
न्यूसाउथवेल्स राज्यमा गत २४ घन्टामा १२ जना नयाँ सङ्क्रमित थपिएका छन् । सो राज्यकी प्रिमियर ग्लेडिज बेरिजिक्लिन्ले मानिसहरूलाई बाहिर जाँदा मास्क लगाउन अनुरोध गर्दै न्यूसाउथवेल्स राज्य कोरोनाविरुद्धको लडाइँमा निकै नाजुक चरणमा रहेको बताएकी छिन् ।
“मास्क लगाउन अनिवार्य त छैन तर भिक्टोरिया राज्यको स्थितिलाई हेर्दा र न्यूसाउथवेल्सभित्र सामुदायिक सङ्क्रमणको जोखिमलाई हेर्दा यो अत्यन्तै महत्वपूर्ण छ । त्यसैले सामाजिक दूरी कायम गर्न नसकिने ठाउँमा रहँदा मास्क लगाउनु अनिवार्य छ । आगामी केही हफ्ता हाम्रा लागि निकै नाजुक छन् ।” प्रिमियर बेरिजिक्लिन्ले भनिन् ।
नेपालीहरूको उल्लेख्य उपस्थिति रहेको न्यूसाउथवेल्स राज्यमा अहिले कोरोना सङ्क्रमित नेपाली भेटिएको कुनै जानकारी आफूसँग नआएको एनआरएनए अस्ट्रेलियाका उपाध्यक्ष तथा न्यूसाउथवेल्स राज्यका संयोजक देव गुरुङले जानकारी दिए ।
“यदि कोही नेपालीलाई कोरोना सङ्क्रमित भएर सहयोग चाहिएको खण्डमा हाम्रो सम्पर्कमा आउनका लागि हार्दिक अपिल पनि गर्दछु । हामी हरतरहले सक्दो सहयोग गर्नका लागि तत्तर छौं ।” संयोजक गुरुङले भने ।
हालसम्म अस्ट्रेलियामा १७ हजार ८ सय ९५ जना कोरोना संक्रमित रहेको सरकारी तथ्याङ्क छ । तीमध्ये १० हजार २ सय ४ जना निको भइसकेका छन् भने २ सय ८ जनाको मृत्यु भइसकेको छ ।
