२६ साउन, कपिलवस्तु ।
कोरोना भाइरस (कोभिड १९) को संक्रमण रोकथाम तथा नियन्त्रणाका लागि जिल्ला प्रशासन कार्यालय कपिलवस्तुले मंगलबारदेखि जिल्लाभर निषेधाज्ञा जारी गरेको छ । मंगलबार बिहान ५ बजेदेखि लागु हुने गरी साउन ३२ गते राति १२ बजेसम्मका लागि जिल्लाभर निषेधाज्ञा जारी गरेको प्रमुख जिल्ला अधिकारी दीर्घनारायण पौडेलले जानकारी दिए ।
प्रदेश ५ का १२ जिल्ला मध्ये कपिलवस्तु सबैभन्दा धेरै कोरोना संक्रमित फेला परेको जिल्ला हो । जिल्लास्तरीय कोरोना संकट व्यवस्थापन समिति (डीसीसीएमसी) को सोमबार बसेको बैठकले अत्यावश्यकीय बाहेक अरु सबै खाले व्यवसाय सञ्चालन गर्न नपाइने निर्णय गरेको छ । खाद्यान्न तथा तरकारी किनमेलका लागि दैनिक बिहान ८ बजेदेखि १० बजेसम्मको समय छुट्याइएको प्रजिअ पौडेलले बताए ।
प्रजिअ पौडेलले भने– ‘बैठकले अति आवश्यकीय वस्तु ढुवानी, एम्बुलेन्स, शवबाहन र राजमार्ग भएर गुड्ने सवारी साधनहरु (जिल्लाभित्र चढ्न ओर्लन नपाउने गरी) बाहेकका यस जिल्लाभित्र गुड्ने सबै प्रकारका निजी र भाडाका सवारी साधन सञ्चालन नगर्ने निर्णय गरेको छ । त्यसै गरी सबै किसिमका व्यापार, व्यवसाय बन्द गर्ने, उद्योग धन्दा, कलकारखानाको हकमा स्वास्थ्य तथा जनसंख्या मन्त्रालयले जारी गरेको न्युनतम स्वास्थ्य मापदण्ड अपनाइ सञ्चालन गर्न सक्ने, सरकारी कार्यालय, बैङ्क तथा वित्तीय संस्थाहरुबाट प्रदान गरिने सेवा पूर्णरुपमा बन्द गर्ने निर्णय गरेको छ ।’
निषेधाज्ञा अवधिमा पूर्वपश्चिम राजमार्गमा बाहेक अन्य भित्री सडकहरुमा सवारी साधन सञ्चालनमा पूर्ण रोक लगाइएको छ । यसअघि स्थानीय प्रशासनले जिल्लामा आंशिक निषेधाज्ञा जारी गरेको थियो ।
प्रदेश स्वास्थ्य निर्देशनालय बुटवलका अनुसार कपिलवस्तुमा आइतबारसम्म ८ सय ५७ जना कोरोना संक्रमित रहेका छन् ।
