२९ साउन, एजेन्सी ।
अयोध्यामा भारतीय प्रधानमन्त्री नरेन्द्र मोदीसँगै श्रीराम मन्दिर स्थापनाको लागि भूमिपूजनमा सहभागी महन्थ नृत्यगोपाल दासमा कोरोनाभाइरस सङ्क्रमणको पुष्टि भएको छ ।
राम जन्मभूमि ट्रष्टका अध्यक्ष रहेका ८२ वर्षीय गोपाल दास बुधबार कृष्ण जन्माष्टमी मनाउनका लागि मथुरा पुगेका थिए। बिहीबार बिहान अचानक उनको स्वास्थ्यमा समस्या देखिएपछि गरिएको परीक्षणमा कोरोना पुष्टि भएको भारतीय सञ्चारमाध्यमले जनाएका छन्।
भारतीय सञ्चारमाध्यमहरूका अनुसार उत्तर प्रदेशका मुख्यमन्त्री योगी आदित्यनाथले महन्थ गोपाल दासको स्वास्थ्य उपचारमा सक्रिय र गम्भीर भएर लाग्न आग्रह गरेका छन् । उत्तर प्रदेशको मथुराका ‘डिस्ट्रिक्ट मजिस्ट्रेट’ एसआर मिश्रले महन्थ दासलाई उपचारका लागि मेदान्त अस्पतालमा भर्ना गरिएको बताए ।
साउन २१ गते अयोध्यामा राममन्दिर स्थापनाका लागि भूमिपूजन समारोहको आयोजना गरिएको थियो । उक्त समारोहमा महन्थ नृत्य गोपाल दाससँगै भारतीय प्रधामन्त्री नरेन्द्र मोदी, मुख्यमन्त्री योगी आदित्यनाथ, उत्तरप्रदेशका राज्यपाल लगायतको उपस्थिति रहेको थियो । उनी करिब एक घण्टा मोदीसँगै मञ्चमा बसेका थिए।
