योगेन्द्र योगी
३० साउन, दोहा ।
मानव तस्करसँग मिलेर कुटपिटको घटनामा संलग्न भएको आरोपमा गैर आवासीय नेपाली संघ (एनआरएनए) यूएईका तीन पदाधिकारीहरु निलम्बनमा पारेका छन् । एनआरएनए दुबई क्षेत्रीय समितिका अध्यक्ष भिम मल्ल र उपाध्यक्ष निराजन खत्रीको उपस्थितिमा नेपालीमाथि कुटपिट भएको भनी नाम मुछिएको हुँदा उक्त घटनाको छानविन किनारा नलागे सम्मका लागि दुवै जनालाई निलम्बन गरिएको गैर आवासीय नेपाली संघ राष्ट्रिय समन्वय परिषद्ले बिज्ञप्ति जारी जानकारी दिएको छ ।
संघका अध्यक्ष प्रकाश कोइरालाद्वारा हस्ताक्षरित बिज्ञप्तिमा बेलायत लैजाने प्रलोभनमा पारी जनही ९ लाख रूपैया लिई यूएईमा एक व्यक्तिको जिम्मा लगाईएको तर, यूएई ल्याएपछि बेलायत पठाउन नसकिने भन्दै यूएईमै राम्रो रोजगारीमा लगाई दिने भनि पासपोट र अन्य कागजात सो व्यक्तिले नियन्त्रणमा लिएको बुझिएको जनाईएको छ । यस विषयमा पीडितहरुले यूएईस्थित नेपाली दूतावास र एनआरएनए यूएईमा उजुरी दिएपछि छानविन प्रकृया अघि बढिरहेको अवस्थामा पीडितमाथि नै कुटपिट गरेको र कानुनी उपचार खोज्न समेत रोक लगाईएको भन्ने उनीहरुमाथि आरोप लागेको परिषद्ले जनाएको छ ।
त्यस्तै अध्यक्षको परामर्श बिना र समितिमा कुनै छलफल नगरी सस्थाको लेटरप्याड र छाप दुरुपयोग गरी एनआरएनए यूएईका उपाध्यक्ष नरेश सेनले मनोमानी ढंगले बिज्ञप्ति निकालेको जनाएको पनि परिषद्ले जनाएको छ । उक्त विज्ञप्तिको बिषयमा अतिरन्जित तथा अन्तराष्ट्रिय रुपमा सस्थाको छवि धमिलो हुन गएकोले उनी संस्थामा रहेर पनि आफ्नो पदीय मर्यादा र जिम्मेवारी दुरुपयोग गरेकोले यो मुद्दाको फैसला नभए सम्म उपाध्यक्ष नरेश सेनलाई समेत निलम्बन गरिएको जनाईएको छ ।
काठमाण्डौं स्थित तीनजुरे ईम्प्लोइमेन्ट सर्भिसेज प्रालीकी जनसंपर्क अधिकृत सिर्जना अधिकारी र दुबई बस्ने श्याम थापाले ६३ जना नेपालीहरुलाई बेलायत लैजाने भन्दै ९ देखि १० लाख रुपैयाँ उठाएर दुबईमा अलपत्र बनाएका दलालहरुको संरक्षण गरेको आरोप मल्ल र खत्रीलाई लागेको थियो ।
