योगेन्द्र योगी
३० साउन, दोहा ।
कोरोनाका कारण कतारबाट स्वदेश फर्किन विभिन्न माध्यमबाट फारम भरेका थप ९ हजार ३ सय ८५ जना नेपालीहरुको सूची नेपाली दूतावासले सार्वजनिक गरेको छ । दूतावासले दिएको जानकारी अनुसार दूतावास मार्फत नेपाल फर्कनका लागि ५ हजार ७ सय ५७ जनाले नाम टिपाएकोमा उनीहरुको नामावली सार्वजनिक गरिएको हो ।
यस्तै कोरोनाका कारण कम्पनीले स्वविवेकले कामदार कटौती तथा कम्पनी बन्द भएपछि कतारका विभिन्न कम्पनीहरुले ३ हजार ६ सय २८ जना नेपाली कामदारलाई पठाउने विवरण दूतावासलाई उपलब्ध गराएको जनाएको छ । यो नामावली नेपाल फर्कने प्राथमिकता सूचि नभई दूतावासमा नाम दर्ता भएको जानकारी मात्र भएको पनि दूतावासले जनाएको छ ।
यस नामावली मध्येबाट प्राथमिकतामा पर्ने नेपालीहरुको सूचि हवाइ उडान तय भएसँगै क्रमश प्रकाशित गर्दै लगिने जनाएको छ । अहिलेसम्म कतारबाट ५ हजार २ सय २ जना नेपालीसहित विभिन्न कारणले मृत्यु भएकामध्ये ४६ वटा शव पनि नेपाल ल्याइएको छ । कोरोनाको महामारी फैलिएपछि कतारबाट स्वदेश फर्किने नेपालीहरुको संख्या भने दिनप्रतिदिन बढीरहेको छ ।
