१ भदौ, दोहा ।
यूएईको शारजाहमा हत्या भएका दुई जना नेपालीमध्ये एकको परिचय खुलेको छ । अगष्ट ८ हत्या भएका दुई नेपालीमध्ये तनहुँका ३६ वर्षिय मंगलराज श्रेष्ठको पहिचान भए पनि अर्का एक नेपालीको भने अझै पहिचान खुल्न नसकेको यूएईस्थित नेपाली दूतावासले जनाएको छ ।
गल्फ न्युजमा यूएईमा दुई नेपालीको हत्या भएको समाचार प्रकाशन भएपछि दूतावासले पनि चासो लिएको जनाएको छ । दुई समूह बीच झगडा भएपछि उनीहरुको हत्या भएको हुन् सक्ने यूएई प्रहरीले जनाएको छ ।
दूतावासका अनुसार पहिचान खुलेका श्रेष्ठको शरीरमा २० ठाउँमा छुरा प्रहार भएको तथा अर्का नेपालीको पनि शरीरमा धारिलो हतियार प्रयोग गरेर हत्या भएको छ । घटनाबारे थप अनुसन्धान भइरहेको र घटनामा संलग्न भएको आशंकामा केही पक्राउ गरिएको जनाइएको छ ।
