नितेश यादव
११ भदौ, जनकपुरधाम ।
धनुषाको बटेश्वरमा पुनः एक हप्ताको लागि लकडाउन थपिएको छ । बिहीबारदेखि लागू हुने गरि अत्यावश्यक स्वास्थ्य सेबा बाहेक सम्पूर्ण सेबाहरु बन्द हुने गरि लकडाउन गर्ने निर्णय गरिएको हो ।
बटेश्वर गाउँपालिकाका अध्यक्ष डम्बरबहादुर राउत तथा क्वारेन्टाइन संयोजक रुद्रनारायण यादवको अध्यक्षतामा बसेको बैठकको निर्णय अनुसार भदौ १७ गतेसम्मको लागि लकडाउन थप गरिएको बताइएको छ । गाउँपालिका अन्तर्गत लाग्ने सानो देखि ठूला सम्पूर्ण हाटबजार पूर्णरूपमा बन्द गर्ने,गराउने साथै बजार पसल बिहान ७ बजे देखि १० बजे सम्म खोल्न दिने गरि निर्णय भएको गाउँपालिका अध्यक्ष राउतले जानकारी दिए ।
त्यस्तै गाउँपालिका अन्तर्गतका सैलुन, पान पसल र होटल पूर्णरुपमा बन्द रहने छन भने औषधि पसल र स्वास्थ्य सेवा खुल्ला रहने जारी सूचनामा भनिएको छ । यसअघि गत साउन ३१ गते घोषणा गरिएको लकडाउनको अवधि बुधबार राति १२ बजे समाप्त भएको छ । साथै गाउँपालिकाले घोषणा गरेको लकडाउन कागजमै सीमित भएको स्थानीयले बताएका छन ।
गाउँपालिका अध्यक्ष राउतले यसअघि साउन ३२ गतेदेखि लागू हुने गरि घोषणा गरेको लकडाउनको समयावधिमा पनि सबै हाटबजार नियमित लाग्दै आएको थियोे, बजारमा मानिसको भिडभाड पनि उस्तै देखिएको थियो । तर, बटेश्वर गाउँपालिका वडा नम्बर ४ स्थित बजारमा लाग्ने हाट अगाडि नै प्रहरी चौकी हुँदा पनि प्रहरीले अनदेखि गरेको थियो । य
स्तो कागजी लकडाउनमा गरिब जनता तथा दिनहुँ ज्याला मजदुरी गरि खानेलाई मात्र सरकारले दुःख दिन खोजेको भन्दै स्थानीयले भने असन्तुष्टि जनाएका छन । बटेश्वर गाउँपालिका वडा नम्बर ३ का एक ५० वर्षीय पुरुषमा बुधबार कोरोना संक्रमण पुष्टि भएको छ । यसअघि एकजना २५ वर्षीय एम्बुलेन्स चालकमा संक्रमण पुष्टि भएको थियो । बटेश्वरका एक कोरोना संक्रमित उपचारपछि निको भइसकेका छन ।
