२७ भदौ,जनकपुरधाम।
जनकपुरमा दुई समुदायबीच झडप हुँदा प्रहरीले सात राउण्ड अश्रु ग्यास प्रहार गरेको छ । शनिबार बिहान जनकपुरधाम उपमहानगरपालिका–२० देवपुरा रुपैठामा झडप भएपछि प्रहरीले अवस्था नियन्त्रणमा लिन सात राउण्ड अश्रु ग्यास प्रहार गरेको हो ।
केही दिनअघि सकिएको मुस्लिमहरूको मोहरम्म पर्वसम्बन्धमा सामाजिक सञ्जालमा कोही व्यक्तिले फोटो हालेर टिप्पणी गरेको विषयमा दुबै पक्षबीच झडप भएको जिल्ला प्रहरी कार्यालय धनुषाका प्रवक्ता डीएसपी मकेन्द्र मिश्रले जानकारी दिए ।
दुबै पक्षबीचको झडप उग्ररुप लिएपछि स्थिति नियन्त्रणमा लिन प्रहरीले अश्रु ग्यास प्रहार गर्नु परेको डीएसपी मिश्रको भनाइ छ । देवपुरा रुपैठा नजिकै रहेको फुलगामा चौकीबाट पुगेको सई नेतृत्वको टोलीले स्थिति नियन्त्रणमा लिन नसकेपछि जिल्ला प्रहरी कार्यालय धनुषाबाट प्रहरी निरीक्षकको नेतृत्वको टोली त्यहाँ पठाइएको थियो ।
झडप साम्य पार्न घटनास्थलमा ५० भन्दा बढी सुरक्षाकर्मी परिचालन गरिएको थियो ।अहिले अबस्था सामान्य भएको छ भने विवाद मिलाउन दुबै पक्षबीच छलफल भइरहेको जनाइएकाे छ ।
