२९ भदौ, काठमाडौं ।
कोरोना बीमाको दावी भुक्तानीका लागि अब निजी प्रयोगशालाको परीक्षण रिपोर्ट पनि मान्य हुने भएको छ । यस अघि सरकारी अस्पतालहरुको मात्रै परीक्षण रिपोर्ट मान्य हुने व्यवस्था रहेकोमा बीमा समितिले मापदण्ड संशोधन गरेर निजी प्रयोगशालाको परीक्षण रिपोर्ट पनि मान्य हुने व्यवस्था गरेको हो । सोमबारदेखि लागू हुने भन्दै समितिले बिमा कम्पनीहरूलाई यसबारे निर्देशन जारी गरेको छ ।
सरकारले निजी प्रयोगशालालाई पीसीआर परीक्षणको अनुमति दिएको अवस्थामा पनि बिमा कम्पनीहरूले तिनलाई मान्यता नदिएको भन्दै चौतर्फी विरोध भएको थियो । नयाँ व्यवस्थाअनुसार अब स्वास्थ्य मन्त्रालयबाट अनुमति पाएका निजी अस्पतालका प्रयोगशालाका रिपोर्टका आधारमा पनि बिमा कम्पनीहरूले कोरोना बिमाको दाबी भुक्तानी दिनुपर्नेछ । ‘स्वास्थ्य तथा जनसंख्या मन्त्रालयबाट कोभिड–१९ परीक्षण गर्न सूचीकृत भएका सरकारी तथा निजी अस्पताल वा प्रयोगशालाबाट पीसीआर परीक्षण गर्दा कोभिड–१९ रोग संक्रमण देखिएको सक्कल रिपोर्ट पेस गर्नुपर्नेछ,’ परिमार्जित मापदण्डमा भनिएको छ । यो सँगै कोरोना बीमा दावी भुक्तानीमा देखिएको बिवादको अन्त्य भएको छ ।
बिमकलाई दाबी भुक्तानीमा शंका लागे बिमकको आफ्नै खर्चमा स्वीकृति प्राप्त अस्पताल वा प्रयोगशालामा परीक्षण गराउन पाउने व्यवस्था पनि मापदण्डमा छ । अब व्यक्तिगत रूपमा कोरोना बिमा गर्न नपाइने भएको छ । परिमार्जित मापदण्डमा व्यक्तिगत बिमालेख खारेज गरी सामूहिक बिमालेख मात्र जारी गर्नुपर्ने उल्लेख छ । यो बिमा ३ महिनाको बच्चादेखि ९९ वर्ष उमेर समूहका व्यक्तिका लागि गर्न सकिन्छ ।
