काठमाडाैँ : कलाकार तथा नेपाल वायुसेना निगम (नेवानि) का वरिष्ठ क्याप्टेन विजय लामाले कोरोना भाइरसलाई गम्भीरतापूर्वक लिन आग्रह गरेका छन्। कोरोना संक्रमणको उपचार गराइरहेका उनले सोमबार विजय लामा अफिसियल युट्युब च्यानलमार्फत आफ्नो अनुभव सुनाएका थिए। ‘पिसिआरको रिपोर्ट पोजेटिभ आएपछि उच्च मनोबलसहित मैले यसलाई सकारात्मक रूपमा लिइरहेको छु,’ करिब २८ मिनेट लामो भिडियोमा उनले भनेका छनर, ‘कोरोना भाइरस महामारीको अवस्थामा सेवा दिँदा संक्रमित भएको हुँदा दुःखीचाहिँ छैन। कोरोना भाइरसलाई जितेर फेरि नियमित उडानमा फर्कनेछु।’
दक्षिण सुडानका लागि भएको चार्टर्ड उडानबाट फर्केपछि गत साता उनलाई कोरोना संक्रणम पृष्टि भएको थियो। कोरोना भाइरस संक्रमण पुष्टि भएलगत्तै उनी सोल्टी होटलको आइसोलेसनमा बसिरहेका थिए। उनले शान्ति मिसनमा खटिएको नेपाली सेनाको एक टोलीलाई निगमको २७४ सिटको एक वाइडबडी जहाजमा लिई अफ्रिकी मुलुक दक्षिण सुडान लगेका थिए। ज्वरो आएपछि होटलको आइसोलेसनमा उनलाई ललितपुरको स्टार अस्पताल लगिएको थियो। ‘ज्वरोसँगै टाउको दुखेको महसुस भएपछि औषधि सेवन गरिरहेको छु,’ भिडियोको सुरुमा उनले भनेका छन्, ‘जिउभरि एकदम पीडा महसुस भइरहेको छ। प्रशस्त पानी र फलफूल खाइरहेको छु। कोरोना भाइरस संक्रमण भयो भनेर डराएको चाहिँ छैन।’
उनले कोरोना भाइरसबाट बच्न सुरक्षित उपाय अपनाउँदाअपनाउँदै पनि संक्रमण सरेको तर्क गरे। ‘कोरोना भाइरसबाट बच्न सुरक्षित उपाय अपनाउँदा समेत संक्रमित भएँ,’ उनले स्मरण गरे, ‘पिसिआर पोजेटिभ भएसँगै खानाको स्वाद र सुँघ्ने शक्ति हराएको अनुभव हुने रहेछ। यसलाई गम्भीरतापूर्वक नलिए संक्रमण देखिन सक्छ।’ आइसोलेसनको बसाइका क्रममा जीवनको महत्वबारे बुझ्न पाइरहेको उनले बताए। ‘अहिले जीवनबारे बुझ्न समय पाइरहेको छु,’ भिडियोमा उनले भनेका थिए, ‘म बलियो भएर कोरोना भाइरस संक्रमणबाट निको भएर फर्कनेछु भन्ने मनोबलले मलाई प्रोत्साहित गरिरहेको छ। ज्वरो बढेर १०३ पुगेसँगै चिकित्सकको सल्लाहअनुसार स्टार अस्पतालमा उपचार गराइरहेको छु। कोरोना कहरको महसुस बल्ल हुँदैछ। अहिलेको परिस्थितिमा घुम्ने र पार्टी जानेलगायत गतिविधिलाई माया मार्दा राम्रो होला। कारण, जीवन अमूल्य छ।’
अस्पताल पुग्दा गम्भीर स्वास्थ्य अवस्थामा पुगेका उनी सामान्य अवस्थामा फर्कंदैछन्। बल्ल खानाको स्वाद थाहा पाउँदैछन्। ‘नियमित चिकित्सकहरूको निगरानीमा छु,’ उनले भिडियोमार्फत भनेका छन्, ‘उहाँहरूको सल्लाहअनुसार औषधि र खाना खाइरहेको छु। बल्ल स्वास्थ्यको अवस्था सुधिँ्रदै गएको महसुस हुँदैछ।’, याे समाचार नागरिक दैनिकमा छापिएकाे छ ।
