२९ माघ, काठमाडाैँ ।
नेपाल कम्युनिष्ट पार्टी नेकपा प्रचण्ड माधव समूहका अध्यक्ष माधव कुमार नेपालले प्रधानमन्त्री केपी शर्मा ओलीले द्धन्द्ध निम्त्याउन खोजेको बताएका छन् । विहिबार काठमाण्डौमा आयोजित प्रशिक्षण भेला कार्यक्रमलाई सम्बोधन गर्दै अध्यक्ष नेपालले छापामार शैलीमा नेतृ रामकुमारी झाँक्रीलाई पक्राउ गरेर ओलीले द्धन्द्धलाई निम्त्याएको बताएका हुन् । तात्कालिन शाही शासन कालमा पनि राजसंस्थाका पदाधिकारीमाथि टिकाटिप्पणी हुने गरेको र त्यसो गरेवापत कसैलाई पक्राउ नगरिएको भन्दै उनले वर्तमान सरकारले भने दिन दहाडै हतियार सहितका प्रहरी पठाएर झाँक्रीलाई पक्राउ गर्ने काम गरेको बताए ।
उनले भने “उहाँ द्धन्द्ध निम्त्याउन लाग्नु भएको छ । हिजो राजा विरेन्द्रकी श्रीमती ऐश्वर्यलाई पम्फादेवी को बैक खाता क्या हो ? भनेर तेत्रो नारा लाग्यो । बोलेका होइनन् ? तर कोही मान्छे गिरफ्तार भएका थिए ? आज त राष्ट्रपतिमाथि केही पनि बिग्रिएको होइन । उहाँले राष्ट्रपतिको गरिमामय पद र मर्यादामा होइन त्यही हैसियतमा उहाम्ँले गरेका कामहरुमा महिला भएर उन्मुक्ति पाउनुहुन्न भन्नुभएको हो । कोही पनि मान्छे आलोचना भन्दा माथि हुनसक्छन् ? संसदमा नीति तथा कार्यक्रम प्रस्तुत गर्दा मेरो सरकार भनेर बोलेको होइन । मेरो सरकार भन्न पाईन्छ ?”
अध्यक्ष नेपालले नेतृ झाँक्रीलाई अपराधीलाई पक्रे जसरी पक्राउ गरेको सरकारसंग अपराधी, भ्रष्टाचारी, तस्कर र बलात्कारीलाई गिरफ्तार गर्नेे हिम्मत नभएको बताए। उनले आफ्ना अध्यक्षलाई चिडियाखानामा राखिदिने भनी अभिव्यक्ति दिने गृहमन्त्री राम बहादुर वादललाई कारवाही हुन्छ कि हुदैन भनी प्रश्न गरे।
उनले भने“बोल्न पनि नपाउने ? भन्न पनि नपाउने ? मुखमा टेप लगाएर बस्नुपर्ने? अपमानजनक कुनै कुरा भनेको पनि लाग्दैन , तर हेर्नुहोस्् त दिन दहाडै हतियारबद्ध प्रहरीहरु पठाएर कुनै अपराधीलाई गिरफ्तार गर्न गएजस्तो । हिम्मत छैन अपराधीलाई गिरफ्तार गर्ने । चरम भ्रष्टाचारीहरु खुल्ला हिडिरहेका छन् । तस्कर, माफियाहरु खुल्ला हिडिरहेका छन् । राज्यको सम्पतिको दोहन गर्ने, जनविरोधीहरु खुल्ला हिडिरहेका छन् । बलात्कारीहरु खुल्ला हिडिरहका छन् । कतिले न्याय पाए ? कतिजना थुनामा परे ? कतिजना राज्यको दण्ड भोगिरहका छन् ? यसको जवाफ छ ? बलात्कारीलाई कारवाही गर भन्दा यो त प्राकृतिक प्रक्रिया हो नि भन्ने अनि आफ्नो अध्यक्षलाई चिडियाखाना राखिदिने भन्ने । यस्तो बोले वापत उनीमाथि कारवाही हुन्छ कि हुदैन ?”
अर्का अध्यक्ष पुष्पकमल दाहालले पार्टीको आन्तरिक लोकतन्त्र नमान्ने प्रधानमन्त्री केपी ओलीले देशको लोकतन्त्रको अभ्यासलाई पनि नमानेको बताए । लोकतन्त्रको अभ्यासलाई नमान्ने प्रमाणको रुपमा ओलीले संसद विघटन गरेको दाहालले बताए । अध्यक्ष दाहालले प्रधानमन्त्री ओलीले पुर्व एमाले आफु र पुर्व माओवादी प्रचण्ड भएको भन्दै भन्दै सर्वसाधरणमा भ्रम छर्ने काम गरेको बताए ।
