३२ साउन, चितवन ।
सुजिता भण्डारी मृत्यु प्रकरणमा पक्राउ परेका सुकदेव भण्डारीविरुद्ध चितवन जिल्ला अदालतमा आत्महत्या दुरुत्साहनमा मुद्दा दायर भएको छ । आइतबार मृतक सुजिताको ठूलो बुबाका छोरा सुकदेवविरुद्ध आत्महत्या दुरुत्साहन मुद्दा दायर भएको हो ।
चितवन जिल्ला न्यायाधिवक्ता कार्यालय प्रमुख महेश खत्रीले सुकदेवविरुद्ध अधिकतम कैद सजायको माग गरेर मुद्दा दायर भएको बताए । आमा अम्बिका भण्डारीले सुकदेवविरुद्ध चितवन प्रहरीमा साउन ६ गते उजुरी दिएकी थिइन् । त्यसको भोलिपल्टै प्रहरीले उनलाई काठमाडौंबाट पक्राउ गरेको थियो ।
‘आत्महत्या दुरुत्साहनमा पाँच वर्ष कैद हुने कानुनी व्यवस्था छ । त्यही मागदाबीसहित मुद्दा दायर भएको छ,’ खत्रीले भने । छानबिनपछि प्रहरीले शुक्रबार सरकारी वकिल कार्यालयलाई अनुसन्धान फाइल बुझाएको थियो ।
राप्ती नगरपालिका–३ की २३ वर्षीय सुजिता असार ११ गते बिहानै घरबाट निस्केकी थिइन् । परिवारले अपहरणमा परेको भनेर दिएको सूचनाका आधारमा प्रहरीले सुजिताको खोजी गरेको थियो । तर घरबाट निस्केको नौ दिनपछि असार २० गते साँझ उनको शव जंगलमा भेटिएको थियाे ।
सो घटनामा अनुसन्धान गरिरहेको प्रहरीलाई सुकदेव र सुजिताको सम्बन्ध पारिवारिक र दाजुबैनीको मात्र नभई शंकास्पद देखिन्छ भनेर परिवारका सदस्यले भनेपछि अनुसन्धानले अर्कै मोड लिएको थियो ।
सुकदेवका बाबु र सुजिताको बाबु सहोदर दाजुभाइ हुन् । सुजिता दिदीकोमा जान्छु भनेर काठमाडौं गएको, सुकदेवलाई भेटेर विवाह गर्न दबाब दिएको खुलेको चितवन प्रहरीले जनाएको छ ।
