२८ भदाै, काठमाडौँ ।
नेकपा (एकीकृत समाजवादी)का अध्यक्ष तथा पूर्वप्रधानमन्त्री माधवकुमार नेपालले एमालेले प्रतिनिधिसभा अवरुद्ध गर्ने क्रममा लगाएका नारामा प्रयोग भएका शब्दप्रति आपत्ति जनाएका छन् ।
सभामुख अग्निप्रसाद सापकोटाले सोमबार आह्वान गरेको सर्वदलीय बैठकमा नेपालले प्रमुख प्रतिपक्षी दलका नेता केपी शर्मा ओलीले संसद् नै नचाहेको भन्दै आलोचना गरेका हुन् । नेपालले एमाले जस्तो गैरजिम्मेवार प्रतिपक्ष हुनु र ओली जस्तो विपक्षी नेता हुनु दुर्भाग्य भएकाे समेत बताए ।
बैठकमा नेता नेपालले भनेका थिए, ‘प्रमुख प्रतिपक्षले प्रयोग गरेका शब्दहरूले उहाँहरूले सभ्यताका सीमा नाघेको देखिएको छ । प्रमुख प्रतिपक्षी दलका नेता अरुको मानमर्दन गर्न बाहेक उहाँसँग लोकतान्त्रिक चरित्र र संस्कार छैन । यस्तो प्रतिपक्ष हुनु हाम्रा लागि दुः खद हो।’
ओली नेतृत्वको प्रतिपक्ष जिम्मेवार भएर प्रस्तुत नभएको नेपालको भनाइ थियो । प्रतिपक्षी दलका नेताले संसद् र सभामुखप्रति पूर्वाग्रह राखेको पनि उनले बताएका थिए ।
बैठकमा नेपालले संसद् पनि नराेकि सभामुखले संवादको कोसिस पनि जारी राख्नुपर्ने बताए । एमाले संवादमा आउनुपर्नेमा त्यसो नगरेर समस्या समाधान गर्ने प्रक्रियाबाट भागेको नेपालको भनाइ थियो । नेपालले सर्वोच्च अदालतले आफूहरूलाई ह्वीप नलाग्ने भनिसकेकोले एमालेकाे कारबाहीकाे अर्थ नभएकाे पनि बताएका थिए ।
