२२ असोज, काठमाडौं।
नेपाली काँग्रेसकी प्रभावशाली नेता सुजाता कोइरालाले आजबाट वरिष्ठ नेता रामचन्द्र पौडेलको समूह छाडेकी छिन् । उनले पौडेलको कार्यशैली पार्टी, देश र जनताको हितविपरित भएको भन्दै साथ दिन नसक्ने बताएकी हुन् ।
पूर्वउपप्रधानमन्त्री समेत रहेकी कोइरालाले भनिन्, ‘रामचन्द्र पौडेल र सशांक कोइरालालाई साथ दिन्नँ । पौडेल र सशांक दुवैसँग नेपाली काँग्रेसलाई हाँक्ने क्षमता छैन ।’
मन्त्रिमण्डलमा नाम नपरेपछि सुजाता कोइराला वरिष्ठ नेता पौडेल र महामन्त्री कोइरालाप्रति असन्तुष्ट बनेकी हुन् । कोइरालाले मीनेन्द्र रिजालको नाम सिफारिश गरेपछि उनी झन् आक्रोशित बनेकी छिन् ।
उनले पौडेलको भूमिकामाथि समेत प्रश्न गर्दै सभापति बन्न नसक्ने ठोकुवा गरिन् । काँग्रेस महामन्त्री डा. सशांक कोइरालाप्रति पनि सुजाताले आक्रोश पोखेकी छिन् । उनले कोइराला महामन्त्री भएर पनि कुनै क्षमता देखाउन नसकेकाे भन्दै सभापति बन्छु भन्दा दुनियाँ हाँस्ने टिप्पणी गरिन् ।
उनले भनिन्,‘रामचन्द्र पौडेल र सशांक कोइराला दुवैजना सभापतिका लागि योग्य छैनन् र हुन पनि सक्दैनन् ।’
