२३ असोज, एजेन्सी ।
नेपाली राष्ट्रिय फुटबल टिमका प्रशिक्षक अब्दुल्लाह अल्मुताइरीले भारतविरुद्धको खेलमा नेपालले बलियो चुनौती पेस गर्ने बताएका छन । शनिबार नेसनल स्टेडियमा आयोजित प्रि म्याच कन्फ्रेन्समा अल्मुताइरीले भारतविरुद्ध नेपालले आफ्नो शतप्रतिशत दिने दाबी गर्दै अहिले नै प्रतियोगितामा सबथोक भने प्राप्त भइनसकेको पनि बताए ।
नेपालले साफ च्याम्पियनसिप २०२१ मा आइतबार भारतको सामना गर्दैछ । आइतबारको पहिलो खेल आयोजक तथा डिफेन्डिङ च्याम्पियन माल्दिभ्सले श्रीलंकाको सामना गर्नेछ । नेपाल र भारतबीचको खेल भने राति हुनेछ । नेपाल दुई खेलबाट छ अंकसहित शीर्ष स्थानमा छ र फाइनल प्रवेशका लागि बलियो प्रत्यासी बनेको छ ।
त्यस अगाडि प्रशिक्षक अब्दुल्लाह अल्मुताइरी सबै नेपाली समर्थकलाई संयमित रहन अनुरोध समेत गरेका छन् । अल्मुताइरीले भने, ‘निश्चित रूपमा भारतविरुद्ध हामीले बलियो चुनौती पेस गर्नेछौं । यसमा कुनै शंका छैन । हामी भारतलाई सम्मान पनि गर्छौं । भारत बलियो टिम पनि हो । तर हामी भारतसँगै डराउँदैनौं पनि ।’
नेपाली टिमका कप्तान किरण लिम्बूले प्रत्येक नेपाली खेलाडीको सपना नै साफ च्याम्पियनसिप जित्नु रहेको बताउँदै त्यसलाई पूरा गर्न सबैले सक्दो मिहिनेत गरेर खेल्ने पनि बताए । उनले भने, ‘हामीले प्रत्येक पाइला निकै सोच विचार गरेर चालिरहेका छौं । हामीले दुई खेल जितिसक्यौं, अब हाम्रो लागि सबैभन्दा महत्त्वपूर्ण खेलका रूपमा भारतविरुद्धको प्रतिस्पर्धा रहेको छ ।’
भारतीय प्रशिक्षक इगोर स्टिमेकले भने नेपाल आफ्नो टिमका लागि परिचित प्रतिद्वन्द्वी रहेको बताउँदै आफ्नो लागि जितबाहेक विकल्प नरहेको बताएका छन् ।
