सात जना जुवाडे पक्राउ

लमजुङ, ९ वैशाख । लमजुङ सदरमुकाम बेसीशहरबाट १ लाख ७ हजार ७ सय ४० रुपैयाँ नगदसहित सात जना जुवाडे पक्राउ परेका छन् ।

बेसीशहर नगरपालिका ८ नारायणस्थानमा डेरामा बसेका व्यक्तिहरू हार जितको लागि बाजी राखी जुवा र तास खेलिरहेको भन्ने गोप्य सूचनाको आधारमा प्रहरीले छापा मार्दा उनीहरू पक्राउ परेका हुन् ।

लमजुङ प्रहरीका अनुसार उनीहरूको साथबाट ३ बुक तास पनि बरामद भएको छ । उनीहरूलाई जिल्ला प्रशासन कार्यालय लमजुङबाट ७ दिनको म्याद थप गरी अनुसन्धान सुरु गरिएको जिल्ला प्रहरी कार्यालय लमजुङका प्रहरी प्रमुख डीएसपी कृष्ण बहादुर कार्कीले बताए ।