विराटनगर, पुस ३०
प्रदेश १ सरकारले प्रभावकारी काम गर्न नसकेको भन्दै पब्लिक फोरमको अगुवाईमा सोमबार विराटनगरमा विरोध प्रदर्शन गरिएको छ । प्रदेश सरकार गठन भएको १० महिना वितिसक्दा पनि जनताले महसुस गर्ने गरी काम नभएको, प्रदेशको नामाकरणसहित स्थायी राजधानी तोक्न नसकेको भन्दै विराटनगरको ट्राफिक चौकमा १ घण्टा प्रदर्र्शन गरिएको हो ।
प्रदेशका मन्त्रीहरु १० महिनादेखि तलब खाएर बसेको, विभिन्न क्षेत्रमा भ्रष्टाचार मौलाएको, महँगी बढेको, स्वास्थ्य र शिक्षामा माफियाकरण बढेकाले प्रदेश सरकारको ध्यानाकर्षण गर्न र स्थानीयलाई सुसुचित गर्न कार्यक्रमको आयोजना गरिएको पब्लिक फोरमका अध्यक्ष उत्तम ढुंगेलले बताए ।
सरकार गठन भएको १० महिना बितिसक्यो तर आम सर्वसाधारण जनताको जनजिविकामा कुनै काम हुन सकेको छैन उनले भने भ्रष्टाचार मौलाएको, महँगी बढेको, माफियाकरण बढेकाले प्रदेश सरकारको ध्यानाकर्षण गर्न कार्यक्रमको आयोजना गरिएको हो ।
कार्यक्रममा सहभागीहरुले तलब, भत्ता र सुविधा केका लागि, जनताले सुशासनको प्रत्याभूत कहिले गर्ने, स्वास्थ्य शिक्षामा माफियाकरण कहिलेसम्म, १० महिनाको उपलब्धी के लगायतका पोष्टर बोकेर धर्ना दिएका थिए । धर्ना कार्यक्रमलाई निरन्तरता दिने कार्यक्रममा जानकारी दिइएकोे थियो ।
