विराटनगर :नेपाल आयल निगमको प्रादेशिक डिपो विराटनगरका लागि बैरानी डिपोबाट ल्याउँदै गरेको इन्धन चोरी भएका विषयमा छानविनका लागि गठन भएको समितीले तयार पारेको प्रतिवेदन कारबाहीका लागि अख्तियार दुरुपयोग अनुसन्धान आयोगमा पुगेको छ ।
गत मंसिर ६ गते बरौनी डिपोबाट विराटनगरस्थित निगमको डिपोमा ल्याउने क्रममा बाटोबाटै २ हजार ४ सय ८४ लिटर डिजेल चोरी भएको थियो । सो घटनाको छानविनकालागि निगमले गठन गरेको समितीले तयार पारेको प्रतिवेदन अख्तियार दुरुपयोग अनुसन्धान आयोगमा पुगेको निगमका प्रवक्ता बिरेन्द्र गोइतले जानकारी दिए ।चोरी प्रकरणको छानबिनका लागि आयल निगमले अञ्जना पोखरेलको नेतृत्वमा समिति गठन गरेको थियो ।
समितिले निगममा बुझाएको प्रतिवेदन मन्त्रालय हुँदै अख्तियारमा पुगेको हो । भारतीय आयल कर्पोरेसन बरौनी डिपोबाट लोड गरी आएको को १ ख ५९६५ नम्बरको ट्यांकर नापचाज गर्दा ८३ सेन्टिमिटर (२४८४ लिटर) डिजेल चोरी भएको पाइएको थियो । चोरी प्रकरणमा आयल निगम प्रादेशिक कार्यालय विराटनगरका निर्देशक दिनेश यादवपनि जोडिएपछि प्रतिवेदन सार्वजनिक भएको थिएन ।, यो समाचार आजको उद्घोष दैनिकमा छापिएको छ ।
