एजेन्सी, चैत १५
जारी इन्डियन प्रिमियर लिग (आईपीएलमा)को बिहीबार राती सम्पन्न सातौँ खेलमा रोयल च्यालेन्जर्स बेंगलोरमाथि मुम्बई इन्डियन्सले रोमान्चक जित हात पारेको छ ।बेंगलोरको घरेलु मैदानमा एम चिन्नास्वामी क्रिकेट स्टेडियमा भएको खेलमा लाथिस मलिङ्गाले अन्तिम ओभरमा जितको लागि १७ रन चाहिएको अवस्थामा ११ रन मात्र खर्चिएपछि मुम्बईले ६ रनको रोमान्चक जित हात पारेको हो ।
१ सय ८८ रनको लक्ष्य पक्ष्याएको बंगलोरले निर्धारित २० ओभरमा ५ विकेट गुमाउँदै १ सय ८१ रन मात्र बनाउन सक्यो । अन्तिम ओभरमा बेंगलोरलाई जितको लागि १७ रन चाहिएको थियो । लाथिस मलिङ्गालाई शिवम दुबेले पहिलो बलमा छक्का प्रहार गरे पनि अन्य पाँच बलमा ४ रन मात्र जोड्न सकेपछि पराजित हुन पुगेको हो । यद्यपी टेलिभिजन रिप्लेमा अन्तिम बल नोबल भएको देखिएपछि कप्तान कोहली लगायत बेंगलोरका स्टाफ अम्पायरप्रति आक्रोशित देखिएका थिए ।
बेंगलोरका डी विलियर्सले ४१ बलमा ४ चौका र ६ छक्का सहित ७०रनमा अविजित रहेपनि टोलीको हार टार्न सकेनन् । मयंक मारकन्डेको सातौं ओभरको अन्तिम बलमा बलमा युवराज सिंहले एवि डी विलियर्सको सिलिपमा क्याच छोड्दा जीवन दान पाएका थिए ।
कप्तान विराट कोहलीले ४६ रनको योगदान दिए । योसँगै विराटले आफ्नो आईपीएल करियरमा ५ हजार रन पुरा गरेका छन् । उनले १३.४ ओभरमा जसप्रित बुमराहले हार्दिक पान्ड्याबाट क्याच गराउनु अघि कोहलीले ३२ बलमा ६ चौका प्रहार गरे । बेंगलोरका ओपनर मोईन अली १३, पार्थिव पटेल ३१, शिम्ररोन हिटमायर ५, कोलिन डि ग्रान्डहोम २ रनमा आउट हुँदा दुबे ९ रनमा अविजित रहे । मुम्बईको जितमा जसप्रित बुमराहले ३ र मयंक मारकंडेले १ विकेट लिए ।
यसअघि टस हारेर पहिला ब्याटिङ थालेको मुम्बईले निर्धारित २० ओभरमा ८ विकेटको क्षतिमा १ सय ८७ रन बनाएको थियो । मुम्बईका लागि कप्तान रोहित शर्माले ३३ बलमा ८ चौका र १ छक्का प्रहार गर्दै ४८ रन जोडे । सूर्यकुमार यादव ३८, क्विन्टन डी कक र युवराज सिंहले समान २३ रन बनाए । हार्दिक पान्ड्याले अन्त्यतिर १४ बलमा २ चौका र ३ छक्का प्रहार गर्दै ३२ रनमा अविजित रहे ।
ओपनर रोहित शर्मा र क्विन्टन डी ककले पहिलो विकेटका लागि ६।३ ओभरमा ५४ रनको साझेदारी गर्दै मुम्बईलाई राम्रो सुरुवात दिलाए । डी ककलाई युजवेन्द्र चाहालले बोल्ड गर्दै ओपनर साझेदारी तोडे । ११ औं ओभरको चौथो बलमा रोहित शर्मालाई उमेश यादवले मोहम्मद सिराजबाट क्याच आउट गराउदै पेभिलिएन फर्काए । युवराजले १४ औं ओभरको पहिलो,दोस्रो र तेस्रो बलमा चाहाललाई लगातार छक्का प्रहार गर्दा चौथो बलमा ठूलो शट खेल्ने क्रममा बाउन्ड्री नजिकै मोहम्मद सिराजले क्याच गरेसँगै मुम्बईको विकेट निरन्तर गुम्दा ठूलो स्कोर बनाउन चुकेको हो ।
मुम्बईका अन्य क्रुनाल पान्ड्या १, काइरान पोलार्ड ५ र मिचेल म्याकक्लेघान १ रनमा आउट भए । बेंगलोरका लागि स्पिनर युजवेन्द्र चाहलले ४ ओभरमा ३८ रन खर्चेर ४ विकेट लिए । त्यस्तै उमेश यादव र मोहम्मद सिराजको नाममा समान दुई विकेट रह्यो । यस अघि आईपीएलको पहिलो खेलमा मुम्बई दिल्लीसँग ३७ रनले पराजित हुँदा बेंगलोर चेन्नईसँग ७ विकेटले पराजित भएको थियो । बेंगलोरले आफ्नो तेस्रो खेल ३१ मार्चमा सनराइज हैदरावादसँग खेल्नेछ । त्यस्तै मुम्बईले किंग्स इलाभने पञ्जावसँग ३० मार्चमा खेल्ने छ ।
