‘द फेस अफ साउथ एसिया’मा नेपालबाट नौ मोडल

काठमाडौं, वैशाख १४
भारतको पुणेमा आयोजना हुने मोडलहरुको अन्तर्रा्ष्ट्रिय प्रतियोगिता ‘द फेस अफ साउथ एसिया’मा नेपालबाट नौ मोडल सहभागी भएका छन् । अप्रिल २५ बाट २७ अप्रिल (शनिबार)सम्म चल्ने प्रतियोगितामा नेपालबाट नौ मोडलले सहभागिता जनाएका हुन् । ‘द फेस अफ साउथ एसिया’ एसियाको फेसन जगतकै सबैभन्दा ठूलो र प्रतिष्ठित प्रतियोगितामा पर्छ ।

प्रतियोगितामा नेपालबाट ‘मोडल हन्ट नेपाल २०१८’ का विजेता आशिष केसी, मोडल हन्टका सहभागी मसिस सुवेदी, पोषण शर्मा, शासोत शाही, राघव अग्रवाल, निर्मला न्यौपाने, रुविष्का श्रेष्ठ, थिन्ले ल्हामो र सुष्मिता थापा सहभागी भएका छन् । कार्यक्रममा नेपालका साथै भारत, श्रीलंकालगायत एसियाका उत्कृष्ट मोडलको प्रतिस्पर्धा रहनेछ । जसमध्ये हरेक देशबाट सहभागीमध्ये एकजनालाई राष्ट्रको नाम जोडेर ‘फेस अफ द कन्ट्री’ घोषणा गर्ने गरिन्छ ।