सरकारले प्रस्तुत गरेको आर्थिक वर्ष २०७६÷७७ को बजेट सकारात्मक भएको विराटनगरका उद्योगी व्यापारीहरुले प्रतिक्रिया दिएका छन् । विराटनगरका उद्योगी, व्यापारीहरुले सरकारले ल्याएको बजेट समग्रमा सकारात्मक भएको भन्दै कार्यान्वयन पक्षमा जोड दिए ।
विराटनगरका उद्योगी व्यापारीहरुले उठाउँदै आएको तयारी वस्तु र कच्चापदार्थको आयातमा सरकारले सम्बोधन गरेको प्रतिक्रिया दिए । उद्योग संगठन मोरङका अध्यक्ष भीम घिमिरेले कच्चापदार्थ र तयारी वस्तुको भन्सार दर कम हुँदा स्वदेशी उद्योग धाराशायी हुने अवस्था आएको जनाउँदै यसपटकको बजेटले उद्योगीको माग सम्बोधन गरेको बताए । उनले समग्रमा बजेट लगानीमैत्री र निजी क्षेत्रमैत्री भएको उल्लेख गरे । “सरसर्ती बजेटलाई हेर्दा सकारात्मक नै छ,” घिमिरेले भने, “अब कार्यान्वयन पक्ष कस्तो हुन्छ त्यो हेर्न बाँकी छ ।”
विगतमा पनि राम्रा–राम्रा नीति तथा कार्यक्रम आएर कार्यान्वयन पक्ष कमजोर हुँदा मुलुकको आर्थिक विकास नभएको उनको भनाइ थियो । उनले कृषि, पर्यटन र ऊर्जालाई प्राथमिकतामा राखेर बजेट आएको जनाए । कार्यान्वयन पक्षलाई सुरुदेखि नै कडाइ गर्नुपर्नेमा उनले जोड दिए । उनले ले शिक्षा, स्वास्थ्य, भौतिक पूर्वाधार निर्माण र कृषि लगायतको क्षेत्रमा बजेट आएको भन्दै स्वागतयोग्य भएको उल्लेख गरे । मोरङ व्यापार संघका अध्यक्ष पवनकुमार सारडाले कृषि आयातमा एन्टि डम्पिङ कानुन लगाइने सकारात्मक भएको बताए । सुनसरी–मोरङ औद्योगिक क्षेत्र निर्माण गर्ने, विराटनगर विमानस्थललाई स्ततरोन्नति गरी ठूला विमान अवतरण र उडान गर्न सक्ने बताउने, पूर्व–पश्चिम राजमार्गलाई ६ लेन बनाउने, हुलाकी राजमार्ग निर्माण गर्नेलगायत बजेटमा पूर्व क्षेत्रलाई प्राथमिकतामा राखेकोमा उनले खुसी व्यक्त गरे ।
“यो बजेट अक्षरशः कार्यान्वयन भयो भने समृद्ध नेपाल सुखी नेपाली सरकारले लिएको नारा अवश्य पनि पूरा हुनेछ,” उनले भने, “तर विगतको बजेट कार्यान्वयनको अवस्था हेर्दा त्यति उत्साहित भइहाल्ने अवस्था छैन ।” बन्द तथा रुग्ण उद्योगलाई सरकारी–निजी साझेदारीमा सञ्चालन गर्ने बजेटले भनेको छ । हरेक प्रदेशमा कम्तीमा एउटा औद्योगिक प्रदर्शनीस्थल निर्माण गर्ने बजेटको अर्को सकारात्मक पक्ष भएको उनको भनाइ थियो । नेपाल उद्योग वाणिज्य संघ प्रदेश–१ का उपाध्यक्ष राजेन्द्र राउतले सिमेन्ट, छठ, रंगलगायत निर्माण सामग्रीमा मुलुकलाई आत्मनिर्भर बनाउने बजेटमार्फत योजना आउनु सकारात्मक भएको बताए । राउतले पूर्वाधारमा प्रशस्त बजेट छुट्याइएको बताए । उनले पूर्वाधारको विकास बिना कृषि, पर्यटन र ऊर्जाको विकास नहुने दाबी गरे । सडक पूर्वाधार भए पर्यटन क्षेत्रको अझै विकास हुने उहाँको कथन थियो । उहाँले पनि बजेट कार्यान्वयनमा जोड दिए । उद्योग संगठनका वरिष्ठ उपाध्यक्ष सुयष प्याकुरेल, उपाध्यक्ष राजकुमार गोल्छा, उद्योगी नन्दकिशोर राठीलगायतले सरकारले ल्याएको बजेटले उद्योगीहरुका धेरै माग सम्बोधन भएको प्रतिक्रिया दिएका छन ।
