विराटनगर, फागुन ७
विगतका निर्वाचनमा मतदाता शिक्षा प्रभावकारी हुन नसकेका कारण धेरै मत बदर भएको एक कार्यक्रमका सहभागीहरुले बताएका छन् ।
दोस्रो निर्वाचन दिवस २०७४ का अवसरमा आज विराटनगरमा आयोजित अन्तरसम्बाद कार्यक्रममा सहभागीहरुले आगामी निर्वाचनहरुमा मतदाता शिक्षालाई प्रभावकारी बनाउनु पर्ने कुरामा जोड दिए ।
क्षेत्रीय निर्वाचन कार्यालय मोरङको आयोजनामा भएको कार्यक्रममा बोल्दै मोरङका मुख्य जिल्ला न्यायधीश राजुकुमार खतिवडाले सबैको साथ र सहयोगले निष्पक्ष र स्वतन्त्र रुपमा निर्वाचन सम्पन्न भएको बताए ।
उनले हाँले तिनै चरणको चुनाव सफल भएको पनि बताए । यस्तै कार्यक्रममा बोल्दै क्षेत्रीय निर्वाचन कार्यालय विराटनगरमा प्रमुख प्रेमप्रसाद सञ्जेलले निर्वाचनमा सहयोग पुगाउने सबैलाई धन्यवाद दिदै निर्वाचन दिवशको सुभकामना दिए ।
कार्यक्रममा बोल्दै मोरङका प्रमुख जिल्ला अधिकारी रामप्रसाद आचार्यले मोरङमा शान्ति सुरक्षा सुदृढ पारिएकोले सुरक्षित रुपमा निर्वाचन सम्पन्न भएको बताए ।
कार्यक्रममा अभिभावक संघ प्रदेश नम्बर १ का अध्यक्ष देवी पन्थी, मोरङ नियोकका अध्यक्ष दिनेश श्रेष्ठ, नेकपा माओवादी केन्द्रका प्रतिनिधि मुक्ति शर्मा, नेकपा एमालेका प्रतिनिधि जगत थापा, नेपाली कांग्रेसका प्रतिनिधि भरत थापालगायतले निर्वाचन आचार संहतिा कडाईका साथ लागू गर्नुपर्ने, विदेशमा रहेका नेपाली युवाहरुलाई भोट हाल्ने व्यवस्था गर्नुपर्ने लगायतका सुझाव दिएका थिए ।
