१५ मंसिर, सुनसरी ।
सुनसरीको कोसी गाउँपालिकामा शनिबार राति एम्बुलेन्स र ट्रक ठोक्किँदा ६ जनाको मृत्यु भएको छ ।
राति साढे १२ बजेतिर कोसी गाउँपालिकास्थित हरिपुरमा भएको सवारी दुर्घटनामा ६ जनाको घटनास्थलमै ज्यान गएको प्रदेश १ ट्राफिक प्रहरी कार्यालय इटहरीका प्रमुख भीम दाहालले बताएका छन् ।
ज्यान जानेमा त्रियुगा नगरपापलिका उदयपुरका राजेश दनुवार, दुर्गाधन राई, टेकेन्द्र राई, तुलाबहादुर राई, मुकेश राई र दिनेश राई रहेका छन्। उनीहरु विराटनगरबाट र शिवमाया राईको शव लिएर गाइघाट गइरहेका थिए।
मृतक सबैको शव सुनसरी सदरमुकामस्थित इनरुवा अस्पतालमा ल्याइएको प्रहरीले जानकारी दिएको छ।
पूर्वपश्चिम राजमार्गस्थित हरिपुरमा पश्चिम जाँदै गरेको को १ च ९३६४ नम्बरको एम्बुलेन्स विरजञ्जबाट पूर्वतर्फ आउँदै गरेको ना २ ख ९०८२ नम्बरको ट्रकसँग ठोक्किएको थियो। एम्बुलेन्स पूर्णरुपमा क्षति भएको छ।
ज्यान गुमाउनेहरु सबै एउटै परिवारका हुन सक्ने प्रहरीले जनाएको छ।
