१२ पुष, काठमाण्डौ । हप्ताको पहिलो दिन शेयर बजार परिसूचक नेप्से झण्डै ४० अङ्कले घटेको छ ।
कारोबार भएका सबै समूहको शेयर ओरालो लागेपछि नेप्से ३९ दशमलव ९८ अङ्कले घटेर १९ सय ९८ दशमलव ६५ विन्दुमा झरेको हो । आइतबार जीवन बीमा समूहको शेयर ५ सय १९ अङ्कले, निर्जीवन बीमा समूहको २ सय ३८, होटलको ९३, उत्पादनको ४६, माइक्रो फाइनान्सको ४२, बैंकको २३, जलविद्युतको ३० र अन्य समूहको शेयर ४३ अङ्कले घटेको छ । आइतबार २ सय ४ वटा कम्पनीका ८१ लाख ७७ हजार कित्ता शेयर ४ अर्ब ६२ करोड ३४ लाख रुपैयाँमा कारोबार भएका छन् । सबैभन्दा धेरै नेपाल लाइफ इन्स्योरेन्सको ६६ करोड ९५ लाख रुपैयाँको शेयर कारोबार भएको छ ।
आइतबार सोल्टी होटल र विशाल बजार कम्पनीका लगानीकर्ताले सबैभन्दा धेरै पाँच प्रतिशतभन्दा धेरैका दरले गुमाएका छन् । समग्र बजार घटे पनि नारायणी विकास बैङ्कका लगानीकर्ताले झण्डै ९ प्रतिशत कमाएका छन् ।
