विराटनगर,जेठ १७
सनम शाक्यको हत्या प्रकरण र ३३ केजी सुनकाण्ड प्रकरणमा फरार रहेका एसएसपी श्याम खत्री अदालतमा उपस्थित भएका छन् ।
गृहमन्त्रालय स्रोतका अनुसार उनी विहीबार मोरङ जिल्ला अदालतमा आफैँ उपस्थित भएका हुन् ।
उनी फरार भएपछि प्रहरी प्रधान कार्यालय नक्सालले खोजीका लागि सर्कुलर जारी गरेको थियो । सरकारले गठन गरेको विशेष अनुसन्धान टोलीले प्रहरी प्रधान कार्यालयको मानव स्रोत विभागमा दरबन्दी रहेका खत्रीलाई केही दिन अगाडि बयानको लागि बोलाए पनि टोलीले पत्र काटे लगत्तै खत्री फरार थिए ।
फरार रहेका एसएसपी खत्री २०७३ पुस २१ गते दुबईबाट विमानस्थल हुँदै आएको तस्करीको ३३ किलो सुन काण्डमा पनि पक्राउ परेका थिए ।
तर २०७३ चैत ४ गते काठमाडौँ जिल्ला अदालतका न्यायाधीश दीपेन्द्र अधिकारीको इजलासले खत्रीलाई २ लाख रूपैयाँ धरौटी लिएर छाड्न आदेश दिएको थियो।
जिल्ला अदालत मोरङमा खत्रीको आजै बयान लिईने स्रोतले जनाएको छ ।
