३० असार, काठमाडौं ।
केही दिनयता विदेशबाट कोरोनाविरुद्धको खोप आउने क्रम बढेसंगै सरकारले सातै प्रदेशमा खोप ढुवानी गरेको छ ।
५५ वर्षदेखि ५९ वर्ष उमेर समूह र ६० वर्षमाथि छुटेका १८ लाख ६ हजारजनालाई भेरोसेलको पहिलो मात्रा खोप लगाउने गरी खोप वितरण थालिएको स्वास्थ्य सेवा विभाग आपूर्ति व्यवस्था महाशाखाले जनाएको छ ।
महाशाखाका अनुसार यो संख्या अनुमानित मात्रै हो । अनुमानित संख्याका आधारमा सात प्रदेशमा खोप ढुवानी सुुरु गरिएको स्वास्थ्य मन्त्रालयका अधिकारीहरूले बताएका छन् ।
सरकारले सोमबार साँझ २९ असारबाट खोप लगाउन सुरु गर्ने निर्णय गरेको थियो । एक्कासि सो निर्णय भएपछि खोप वितरणमा समस्या देखिएको छ । ‘स्वास्थ्य मन्त्रालयले २४ घन्टाको समयसमेत नदिई खोप सुरु गर्ने निर्णय ग¥यो ।
राजधानीबाहिर खोप पुर्याउन सकिएको छैन । त्यसैले खोप ढुवानीमा एक–दुई दिन लाग्नेछ,’ आपूर्ति महाशाखाका एक अधिकारीले भने ।
स्वास्थ्य सेवा विभाग, परिवार कल्याण महाशाखाले १८ लाख ६ हजार ६५ जना खोप लगाउने सूचीमा पर्ने भए पनि ९० प्रतिशत अर्थात् १६ लाख २५ हजार ४९५ व्यक्तिले खोप लगाउने अनुमान गरिएको छ । सोहीअनुसार १६ लाख ८१ हजार ५५० डोज खोप प्रदेशहरूमा पठाइएको हो ।
चीनबाट ल्याएको भेरोसेल खोप २६ लाखमध्ये करिब १७ लाख ४० हजार ९६४ डोज लगाउन बाँकी छ । खोप लगाउँदै जाँदा थप खोप आउने अनुमान स्वास्थ्य अधिकारीहरूको छ ।
पहिलो चरणमा मंगलबारदेखि बागमती, गण्डकी र लुम्बिनी प्रदेशमा खोप कार्यक्रम सुरु भएको छ । अन्य प्रदेशमा खोप पुगेपछि अभियान चल्नेछ । हालसम्म ६५ लाख डोज खोप आइसकेको छ ।
चीनसँग खरिद गरेकामध्ये ३२ लाख र भारतसँग खरिद गरेकामध्ये १० लाख डोज खोप आउन बाँकी छ । जापानले नेपाललाई कोभ्याक्स सुविधामार्फत १६ लाख डोज एस्ट्राजेनेका खोप दिने भएको छ ।
जापानका विदेशमन्त्री मोतेगी तोसिमित्सुले नेपाललाई कोभ्याक्स सुविधामार्फत १६ लाख डोज एस्ट्राजेनेका खोप उपलब्ध गराउने बताएका हुन् ।
कोभ्याक्स सुविधाअन्तर्गत नेपाललाई खोप उपलब्ध गराउन लागिएको नेपालस्थित जापानी दूतावासले मंगलबार जनाएको छ । ‘खोप जुलाई मध्यदेखि अगस्ट अन्तिम सातासम्म आपूर्ति हुनेछ,’ दूतावासले भनेको छ ।
