२३ साउन, काठमाडौँ ।
स्वास्थ्य तथा जनसङ्ख्या मन्त्रालयले देशभर एक हजार ४३३ खोप केन्द्र थप गरेको छ । कोरोना भाइरसविरुद्धको खोप लगाउनेको भीड हुन थालेपछि मन्त्रालयले खोप केन्द्र थप गरेको हो ।
देशभर एक हजार ४३३ खोप केन्द्र थप गरिएको स्वास्थ्य मन्त्रालयका सहप्रवक्ता डा. समीरकुमार अधिकारीकाले जानकारी दिए ।
थप गरिएको खोप केन्द्रसहित अहिले देशभर चार हजार ४२२ खोप केन्द्र पुगेको उनले बताए । ‘अहिले केही खोप केन्द्र थप गरिएको छ । पछि अझै खोप आउँदै जान थालेपछि पुनः खोप केन्द्र थप गर्दै जान्छौं,’ उनले भने । त्यस्तै काठमाडौं उपत्यकामा ८३ खोप केन्द्र थप गरिएको छ । थप गरिएपछि उपत्यकामा १४१ खोप केन्द्र पुगेको छ । यसअघि उपत्यकामा ६६ खोप केन्द्र सञ्चालनमा रहेको थियो ।
सरकारले २०७७ माघ १४ गतेदेखि नेपालमा कोरोनाविरुद्धको खोप लगाउन शुरु गरेको हो । खोप अभियानअन्तर्गत अहिलेसम्म नेपालमा ४४ लाख तीन हजार २१ जनाले पहिलो मात्रा र २२ लाख आठ हजार ५५ जनाले पूर्ण मात्रा खोप लगाइसकेको स्वास्थ्य मन्त्रालयले जनाएको छ ।
