८ भदाै, एजेन्सी।
अफगानिस्तानमा उब्जिएको पछिल्लो घटनाक्रमबारे भारतका प्रधानमन्त्री नरेन्द्र मोदी र रुसी राष्ट्रपति भ्लादिमिर पुटिनबीच वार्ता भएको छ । मङ्गलबार बिहान उनीहरबीच टेलिफोन कुराकानी भएको हो ।
छलफलमा दुबै नेताबीच अफगानिस्तानको पछिल्लो अवस्थाबारे चर्चा गरेका हुन् । समाचार संस्था एएनआईका अनुसार मोदी र पुटिनबीच करिब ४५ मिनेट लामो टेलिफोन कुराकानी भएको थियाे।
प्रधानमन्त्री मोदीले राष्ट्रपति पुटिनसँगको वार्तालाप गरेको फोटोसमेत ट्वीटरमा साझा गरेका छन्। उनले ट्वीटमा लेखेका छन्,“अफगानिस्तानमा विकसित पछिल्लो घटनाक्रमबारे मेरा मित्र राष्ट्रपति पुटिनसँग विस्तृत र उपयोगी छलफल भएको छ । हामीले द्विपक्षीय एजेण्डा, कोभिड १९ विरुद्ध भारत र रुसबीच समन्वय सम्बन्धमा समेत छलफल गर्दै महत्वपूर्ण मुद्दामा आपसमा समन्वय गर्न सहमत भएका छौं ।”–उनले ट्वीटमा उल्लेख गरेका छन् ।
तालिबानले अफगानिस्तानको राजधानी काबुल नियन्त्रणमा लिएपछि भारतले आफ्नो कूटनीतिज्ञसहित भारतीय नागरिकलाई फिर्ता गरिसकेको छ । तालिबानबारे भारतले अझै आफ्नो दृष्टिकोण सार्वजनिक गरिसकेको छैन ।
