काठमाडौं : महाकाली नदी तर्ने क्रममा तुइनको लठ्ठा खुस्काइदिएपछि नेपाली युवा जयसिंह धामी बेपत्ता भएको घटना अनुसन्धानमा भारतले असहयोग गरेको छ ।
आफ्नै नागरिक बेपत्ता भएको घटनामा दोषीलाई कारवाही गराउनुको सट्टा नेपाल सरकार पनि ढाकछोपमा लागेको छ ।
समितिको प्रतिवेदन आएपछि मात्रै भारतसँग कुटनीतिक पत्राचार गर्ने सरकारको तयारी छ । तर, प्रतिवेदन कहिले आउँछ, अनिश्चित छ ।
महाकालीपारि खटिएका भारतीय सुरक्षाकर्मीले नै टुइनको लठ्ठा खुस्काएकै कारण जयसिंह धामी महाकाली नदीमा हेलिएका हुन्, यो नै अहिलेसम्मको हाम्रो निचोड हो, त्यसमै केन्द्रित रहेर प्रतिवेदन लेखनको काम अघि बढेको छ, समितिका एक सदस्यले भने ।
यसरी घटनामा भारतीय सुरक्षाकर्मीको प्रत्यक्ष संलग्नता रहेको निष्कर्षसहित प्रतिवेदन आउने निश्चित भएपछि सरकारले प्रतिवेदन लेखनमा ढिलाइ गराएको छ । सरकारले राहातस्वरुप जयसिंहका परिवारलाई १० लाख रुपैयाँ दिने निर्णय गरेको छ ।
बिहीबार बसेको मन्पिरिषद्ले गृहमन्त्री बालकृष्ण खाँणको प्रस्ताव अनुमोदन गरेको हो । उच्च स्रोतका अनुसार गृह मन्त्रालयका सहसचिव तथा छानबिन समितिका संयोजक जनार्दन गौतमले स्थलगत निरिक्षण र प्राप्त तथ्य प्रमाणका आधारमा घटना भारतीय पक्षबाटै भएको ब्रिफिङ गृहमन्त्रीलाई गरेका छन् ।
त्यसैले प्रतिवेदन आउनुअगावै परिवारलाई राहत रकम दिने निर्णय भएको हो ।,याे समाचार कान्तिपुर दैनिकमा छापिएकाे छ ।
