१० असोज,एजेन्सी ।
दोहोरो अंकको मुद्रास्फीति र पाउन्ड स्टेर्लिङ कमजोर बन्दै जाँदा बेलायतको अर्थतन्त्रमा मन्दीको संकेत देखा परेको छ। पछिल्लो समय बेलायतको मुद्रा पाउन्ड स्टेर्लिङ अमेरिकी डलरको तुलनामा कमजोर बन्दै गएको छ। पाउन्ड स्टेर्लिङ सोमबार अमेरिकी डलरको तुलनामा ४ प्रतिशतले कमजोर बनेको छ।
पाउन्ड स्टेर्लिङ डलरको तुलनामा हालसम्मकै कमजोर बनेको छ। गत साता बेलायती प्रधानमन्त्री लिज ट्रसले ५० वर्षपछि कर प्रणालीमा हेरफेर गरेकी थिइन्। योसँगै बेलायतको मुद्रा बजार झनै कमजोर बन्दै गएको छ। रुस र युक्रेनको युद्धले इन्धनको मूल्यमा आएको बढोत्तरीसँगै धर्मराएको बेलायतको अर्थतन्त्र प्रधानमन्त्री ट्रसले ल्याएको नयाँ कर प्रणालीले झनै कमजोर बनेको छ ।
विपक्षी पार्टीका केन क्लर्कले आइतबार अहिलेको सरकारको कर प्रणालीले पाउन्ड स्टेर्लिङ झनै कमजोर हुने भन्दै कडा आलोचना गरेका छन् । उनले बेलायत सरकारको कर प्रणलीमा हेरफेर गर्ने निर्णयले धनीहरुलाई मात्रै फाइदा भएको आरोप पनि लगाएका छन् ।
यसअघि प्रधानमन्त्रीको दौडमा रहदा समेत ट्रसले कर नीति र बेलायतको अर्थव्यवस्थालाई नै चुनावी एजेन्डा बनाएकी थिइन । केही महिना अघि मात्रै बेलायतको अर्थतन्त्रलाई भारतले पछि पारेको थियो । अन्तर्राष्ट्रिय मुद्रा कोषको अध्ययन प्रतिवेदनलाई उदृत गरिएअनुसार भारतले विश्वकै अर्थतन्त्रको ३.५ प्रतिशत हिस्सा ओगटेको छ ।
पहिलो चौमासिकमा १३.५ प्रतिशतले वृद्धि हुँदा भारतीय अर्थतन्त्रको आकार ३ हजार ८ सय ९४ अर्ब पुगेको छ । अघिल्लो आर्थिक वर्षमा यसअघि भारतभन्दा बेलायत निकै अघि देखिएकोमा भारतले गरेको उच्च वृद्धिले बेलायत पछि परेको छ ।
सबैभन्दा बढी अमेरिकाले २४ र चीनले १९ प्रतिशत हिस्सा ओगटेका छन् भने भारतभन्दा अघि जापान र जर्मनी रहेका छन् । आइएमएफको अध्ययनले भारत सन् २०२७ मा संसारको चौथो ठूलो र २९ मा तेस्रो ठूलो अर्थतन्त्र भएको देश बन्ने प्रक्षेपण गरिएको छ ।
