११ असोज,काठमाण्डौ ।
उत्तरी गोरखाको मनास्लु हिमालको तेस्रो आधार शिविरमा सोमबार बिहान गएको हिमपहिरामा परी बेपत्ता भएकामध्ये एक जनाको मृत्यु भएको छ भने १३ जनाको सकुशल उद्धार गरिएको जिल्ला प्रहरी कार्यालय गोरखाले जनाएको छ । मौसम प्रतिकुल हुँदा गएराति तेस्रो शिविरमै राखिएका १० जनालाई अहिले बिहान हेलिकोप्टरबाट उद्धार गरेर सामागाउँसम्म ल्याइएको एसपी केदार खनालले बताएका छन् ।
‘दुई जनाको हिजै उद्धार गरिएको थियो । अहिले बिहान १० जनाको उद्धार भयो’, एसपी केदार खनालले भने, ‘हिजो दुई र आज चारजना गरेर छ जनालाई काठमाडौं पु¥याइसकिएको छ । अरुलाई पनि काठमाडौँ लाने तयारी भइरहेको छ ।’
संखुवासभाका ४० वर्षीय निमा दोर्जे शेर्पा, संखुवासभाकै २५ वर्षका दावा शेर्पा, दोलखाका ४० वर्षीय फुरिता शेर्पा, दोलखाकै ३७ वर्षका लाक्पा तामाङलाई मंगलबार बिहान सवा आठबजे काठमाडौं लगिएको हो । उनीहरुमध्ये निमा दोर्जे शेर्पा गम्भीर घाइते छन् ।
तीन जनाको अवस्था सामान्य भएकाले हिँडेर तेस्रो शिविरबाट सामागाउँ झरिरहेका उनले बताए । मृत्युहुनेमा सङ्खुवासभाका अनुप राई रहेका जिल्ला प्रहरी कार्यालय गोरखाका प्रहरी उपरीक्षक खनालले जानकारी दिएका छन् ।
उद्धारका लागि सिम्रिक एयर, हेली एभरेस्ट र कैलाश एयरका तीन हेलिकोप्टरहरु परिचालन गरिएको छ । सोमबार दिउसो १२ बजे हिमपहिरो जाँदा मनास्लु आरोहीका लागि आत्यावश्यकीय सामग्री ओसार्दै गरेका १३ जना सहयोगीहरु पुरिएका थिए ।
उनीहरुमध्ये एकजनाको मृत्यू भएको छ भने १२ जना घाइते छन् । मनास्लु आरोहण गर्न यो सिजनमा पर्यटन विभागबाट ४०४ जना विदेशी आरोहीले अनुमति लिएका छन् । विदेशी आरोही र नेपाली सहयोगी गरी एकहजार जना भन्दा धेरै अहिले मनास्लुका विभिन्न शिविरमा रहेको पर्यटन विभागले जनाएको छ ।
