१५ मंसिर, एजेन्सी ।
फिफा विश्वकपको इतिहासमै पहिलोपटक महिला रेफ्रिहरुले सम्पूर्ण खेल खेलाएको देखिने भएको छ । आज राति समूह ‘ई’ अन्तर्गत हुने जर्मनी र कोस्टारिकाबिचको ठूलो र महत्वपूर्ण खेलको मैदानमा मुख्य रेफ्रि र सहायक रेफ्रि गरी तिन जना महिलाले खेल संचालन गर्नेछन् ।
कतारको अल बायत स्टेडियममा आज राति १२, ४५ मा हुने जर्मनी र कोस्टारिकाबिचको खेलमा फ्रान्सकी स्टेफानी फ्रापार्टले मुख्य रेफ्रिको रुपमा खेल संचालन गर्नेछिन् । फ्रापार्टसँगै खेलमा दुई महिला सहायक रेफ्रि पनि हुनेछन् । सहायक रेफ्रिमा नुइजा ब्याक र करेन डियाज रहनेछिन् । ३८ वर्षीय फ्रापार्ट सन् २०१९ मा फ्रान्सको लिग–१ मा रेफ्री बनेकी थिइन् ।
मेस्सी, नेयमार र एमबाप्पे एउटै लिग टोली पीएसजीबाट क्लब फुटबल खेल्छन् । फ्रापार्टले २०१९ मा महिला विश्वकपको फाइनलमा पनि रेफ्री गरिन् । फ्रापार्ट २०१९ युइएफए सुपर कपको फाइनल खेलका लागि रेफ्री प्यानलमा थिइन् साथै २०२० च्याम्पियन्स लिगमा सहायक रेफ्रीको जिम्मेवारी सम्हालिसकेकी छिन् ।
फिफा विश्वकपमा छनोट भएपछि फ्रापार्टले भनिन् ‘विश्वकपका लागि छनोट भएकोमा म निकै खुसी छु । अब रेफ्रिहरुको छनौट लिङ्गको आधारमा होइन योग्यताका आधारमा हुन्छ । फिफाले विश्वकपमा महिला रेफ्री बोलाएर विश्वलाई मजबुत सन्देश दिएको छ ।’ फ्रापार्टले फुटबल इतिहास र तथ्याङ्कको अन्तर्राष्ट्रिय महासंघ (आईएफएफएचएस) बाट २०१९, २०२० र २०२१ मा वर्षको उत्कृष्ट रेफ्रीको अवार्ड प्राप्त गरेकी थिइन् ।
समूह ‘ई’ मा स्पेन, जापान, जर्मनी र कोस्टारिका छन् । जहाँ स्पेन एक जित र एक बराबरीमा ४ अंक जोड्दै समूहको शीर्ष स्थानमा छ । जर्मनी मात्र १ अंक जोडेर अन्तिम स्थानमा छ । जापान ३ अंकका साथ दोश्रो र कोस्टारिका समान अंकसहित तेश्रो स्थानमा छ । राम्रो गोल अन्तरका कारण जापान कोस्टारिकाभन्दा अगाडि छ ।
गत हप्ता स्पेनसँगको खेलमा बराबरी भएपछि जर्मनीको राउण्ड अफ १६ मा पुग्ने सम्भावना कमसल बनेको हो । कोस्टारिकाविरुद्ध हुने अन्तिम लिग खेलमा जर्मनीले ठूलो अन्तरको जितमात्र नभई स्पेन र जापानबिचको खेलको नतिजामा समेत निर्भर रहनुपर्नेछ । जर्मनीका खेलाडीहरुले जापान स्पेनसँग पराजित भएको हेर्न चाहन्छन् ।
