२५ मंसिर,काठमाण्डौ ।
५४ जना सन्तानको पिताका रुपमा चर्चित रहेका पाकिस्तानका अब्दुल मजिद मैंगलको निधन भएको छ । पाकिस्तानमा सन् २०१७ को जनगणनामा ५४ जना सन्तानको पिता भएको पाइएपछि उनी चर्चित बनेका थिए ।
अफगानिस्तानसँग सीमा जोडिएको पाकिस्तानको नोशकी जिल्लामा रहँदै आएका उनको ७५ वर्षको उमेरमा निधन भएको पाकिस्तानी संचारमाध्यामहरुले उल्लेख गरेका छन् । ६ जना महिलासँग विवाह गरेका उनको पहिलो विवाह १८ वर्षको उमेरमा भएको थियो । जसमध्ये उनका २ वटी श्रीमतीको यसअघि नै निधन भइसकेको छ ।
उनका ५४ सन्तानमध्ये १२ सन्तानको पनि यसअघि नै निधन भइसकेको छ । उनका २२ जना छोरा र २० जना छोरी गरी कुल ४२ जना सन्तान जीवित छन् । उनका नातिनातिना र पनाती पनातिनाको संख्या खुलेको छैन् । धेरै सन्तान भएकाले उनीहरुको पालन पोषण र शिक्षा दीक्षाका लागि अब्दुल मजिदले फरक फरक काम गरेका थिए ।
उनको साथमा एउटा इरानी गाडी थियो ।जुन उनले मृत्युको ५ दिन अघिसम्म पनि चलाएर यात्रीलाई सेवा दिएर केही पैसा कमाएका थिए ।अब्दुलका छोरा शाह अलीले भनेका छन्, ‘४२ जना छोराछोरीको शिक्षा दीक्षा र अरु आवश्यकता पूरा गर्नका लागि उहाँले अन्तिम समयसम्म कोसिस गर्नुभयो ।’साह अलीले आफूले पितालाई आरम गरेर बसेको कहिल्यै नदेखेको बताउदै भनेका छन् ‘उहाँलाई मैंले सधैं काम गरिरहेको र मिहेनत गरिरहेको मात्र देखेँ ।’
आफूलाई पढाउन र अन्य आवश्यकता पूरा गर्न बुबाले विभिन्न काम गरिरहेको उनले बताए । उनी भन्छन्, “उहाँसँग जाम्बाड (इरानी कमर्शियल गाडी) गाडी थियो। बुढेसकालको बाबजुद पनि मृत्यु हुनुभन्दा पाँच दिनअघिसम्म परिवारको पूर्ति गर्न गाडी चलाइरहनुभयो।” उनले भने, ‘हामीमध्ये कोही बीए र कोही म्याट्रिक्स गरेका छौँ तर उचित रोजगारी नभएकाले बुबाको उपचार गराउन सकेनौँ ।’
देशका अन्य भागमा ठूला परिवारलाई सरकारबाट सहयोग गर्ने गरेको सुनेको शाहले बताए तर यहाँ सबैभन्दा ठूलो भए पनि आफ्नो परिवार सरकारी सहयोगबाट वञ्चित रहेको बताए । यस वर्षको मनसुनी बाढीले आफ्नो घर भत्किएको उनले बताएका छन् । उनले भने, ‘हामीसँग घर बनाउन सक्ने क्षमता छैन र सरकारले अहिलेसम्म घर पुनर्निर्माणका लागि कुनै पहल नगरेकोले अन्य परिवारभन्दा हाम्रो ठूलो परिवारले बढी समस्या भोग्नुपरेको छ ।’
