९ फागुन , काठमाण्डौ ।
प्रधानमन्त्री पुष्पकमल दाहाल प्रचण्ड प्रधानमन्त्री बन्नु अघि र बनेपछि पनि आफ्नो कार्यकाललाई ऐतिहासिक बनाउने भन्दै अन्तिम इनिङलाई सुखद बनाउने अभिब्यक्ति दिइरहन्छन् । यसअघिका आफ्ना दुई कार्यकालमा आफूले काम गर्न नपाएको भन्दै यो कार्यकाल जनताको मानसपटलमा परिवर्तनको छाप छाड्ने गरी काम गर्ने प्रतिवद्धता उनले पटक पटक दोहोर्याउदै आएका छन् ।
हुन्लाई उनको सरकार कमजोर गठबन्धनको धरातलमा बनेको भएपनि उनलाई ऐतिहासिक रुपमा अधिक राजनीतिक दलहरुले विश्वासको मत दिएर काम गरेर देखाउन मार्ग प्रशस्त गरिदिएका छन् । दलहरुले प्रचण्डमाथि देखाएको यो अटुट विश्वासलाई व्यवहारमा देखाउन भने प्रधानमन्त्रीका रुपमा उनले देश र जनताको अवस्थामा परिवर्तन ल्याउनु पर्नेछ ।
परिवर्तनको आभास आमजनताले गर्न पाउनु पर्छ । यस्तो बेला प्रधानमन्त्रीको कामको स्प्रीट बढाउनका लागि सल्लाहकार तथा सचिवालयको जिम्मेवारी निक्कै नै महत्वपूर्ण मानिन्छ । आफूले ठानेको काम गर्ने प्रशस्त मार्ग पाएका प्रधानमन्त्री प्रचण्डले आफ्नो परराष्ट्र सल्लाहकारको जिम्मेदवारी रुपक सापकोटालाई दिएका छन् ।
रुपक पूर्व सभामुख अग्नी सापकोटाका छोरा हुन् । प्रचण्ड प्रधानमन्त्रीमा नियुक्त भएदेखि नै परराष्ट्र सल्लाहकारको रुपमा काम गर्दै आइरहेका रुपक फागुन १ गतेदेखि औपचारिक रुपमा नियुक्त भएका हुन् । उनी नेपालको परराष्ट्र नीति र छिमेकी मुलुकबीचको सम्बन्धका विषयमा जानकार मानिन्छन् ।
उनले चीनबाट अन्तर्राष्ट्रिय सम्बन्धमा पिएचडी गरेका छन् । रुपक नेपालको परराष्ट्र नीति र छिमेकी मुलुकबीचको सम्बन्धका विषयमा नयाँ रणनीति अख्तियार गर्नुपर्ने विश्लेषण गर्दै आइरहेका छन् । अघिल्लो पटक केपी शर्मा ओली प्रधानमन्त्री भएका बेला उनलाई परराष्ट्र मामिला अध्ययन प्रतिष्ठानको उपकार्यकारी निर्देशक बनाइएको थियो । प्रतिष्ठान परराष्ट्र मामिलाको एक मात्र सरकारी थिंक ट्यांक हो ।
यस्तै प्रधाानमन्त्री नियुक्त भएकै दिन मुख्य स्वकीय सचिवमा सन्तकुमार दरै, स्वकीय सचिवमा रमेश मल्ल र गंगा दाहाल नियुक्त भएका थिए । प्रेस विज्ञमा मनहरि तिमल्सिना, प्रेस संयोजकमा सुर्य किरण शर्मा नियुक्त, स्वकीय सहसचिवमा गोकर्ण प्रकाश भट्ट र आइटी विज्ञमा प्रकाश रायमाझी, प्रशासन जनसम्पर्क विज्ञमा नेता रामदीप आचार्य, जनसम्पर्क विज्ञमा देवेन्द्र पराजुली, बुद्धि जिसी नियुक्त भएका छन् ।
प्रधानमन्त्रीको आर्थिक सल्लाहकार भने अझै नियुक्त भएका छैनन् । यसअघि प्रधानमन्त्रीको राजनीतिक सल्लाहकारमा हरिबोल गजुरेल नियुक्त भएका थिए । यस्तै, शिव खकुरेल पनि प्रधानमन्त्रीको सचिवालयमा छन् । फोटो स्पेशलिस्टमा प्रदीपराज वन्त छन् ।
