१४ फागुन, काठमाण्डौ ।
कहिले सडक त कहिले तटबन्धका नाममा नेपाली भूभाग अतिक्रमण गरिरहेको भारतीय पक्षले पछिल्लो समय विना अनुमति महाकाली नदीमा विपद् प्रतिकार्य र खोज उद्धार अभ्यास गरेको छ । भारतीय सीमा सुरक्षा बल एसएसबीले नेपाल र भारतबीचको सीमा महाकाली नदीमा विपद् प्रतिकार्य र खोज उद्धार अभ्यासको नाममा नेपाली पक्षसँग विना समन्वय ¥याफ्टिङ गरेको हो ।
भारतीय पक्षले अन्तर्राष्ट्रिय कानुन विपरीत ¥याफ्टिङ गरेको भन्दै नेपालले आपत्ति जनाएको छ । कुनै जानकारी र समन्वयविना ¥याफ्टिङ गरेको भन्दै जिल्ला प्रशासन कार्यालय दार्चुलाले भारत पिथौरागढका डीएम रिना जोशीलाई पत्राचार गरेको छ ।
नेपाली प्रशासनको समन्वयविना महाकालीमा एसएसबीको गतिविधि किन गरियो भनेर दार्चुला प्रशासनले पिथौरागढ प्रशासनसँग जवाफ मागे पनि भारतीय प्रशासनले जवाफ दिएको छैन । सीमा क्षेत्रका सुरक्षा निकायका प्रमुखको नियमित बैठकमा पनि एसएसबीले महाकाली नदीमा गरिरहेको ¥याफ्टिङका विषयमा नेपाली पक्षले आपत्ति जनाएको छ ।
पत्रमा ¥याफ्टिङको विषयमा जानकारी दिन र सीमा क्षेत्रमा अबदेखि यस्तो नगर्न भनिएको छ । पिथौरागढको झुलाघाटमा रहेको एसएसबीको शिविरमा भएको बैठकमा बैतडी प्रशासनले पूर्वजानकारी र समन्वय गरेर मात्र यस्ता गतिविधि गर्न भनेको छ ।
भारतीय पक्षले अबदेखि समन्वय गर्ने बताएको बैतडीका प्रमुख जिल्ला अधिकारी सुरेश पन्थीले जानकारी दिए । सीमा क्षेत्रमा कुनै पनि गतिविधि गर्नुपहिले दुवै देशको अनुमति र समन्वय हुनुपर्ने अन्तर्राष्ट्रिय मान्यता छ ।
