१८ फागुन, एजेन्सी ।
विश्व विजेता अर्जेन्टिनी स्टार लियोनल मेसीले आफ्नो विश्वकप विजेता टोलीका सहकर्मी र अर्जेन्टिनाका स्टाफका लागि ३५ वटा आईफोन अर्डर गरेका छन्। यी फोन २४–क्यारेट उपकरण हुन् जुन प्रत्येक खेलाडी र कर्मचारीहरूको लागि व्यक्तिगत हुनेछ ।
अन्तराष्ट्रिय संचारमाध्यामका अनुशार पेरिस सेन्ट जर्मेन (पीएसजी) स्टारले आफ्ना टोलीका साथीहरूका लागि अनुकूलित फोन उपहार दिनका लागि १ लाख ७५ हजार पाउन्ड खर्च गरेको बताइएको छ। उक्त फोनमा कथित रूपमा एएफए लोगोको साथ प्रत्येक व्यक्तिको नाम कुँदिएको हुनेछ।
आइडिजाइन गोल्डका सीईओ बेनले द सनसँग कुरा गर्दै मेसी उनीहरूको वफादार ग्राहक भएको खुलासा गरेका छन्। दिग्गज फुटबलरले टोलीमा सबैलाई उपहार दिन चाहन्थे तर अरू धेरैले विगतमा गरेको जस्तै घडीहरू हस्तान्तरण गर्न चाहँदैनन्।
उनले भने,”लियोनल ‘गोट’ मात्र होइन, उनी आइडिजाइन गोल्डका सबैभन्दा वफादार ग्राहक हुन् र विश्वकपको फाइनल भएको दुई महिनापछि हामीसँग सम्पर्कमा आएका थिए। उनले भने कि उनी सबै खेलाडी र स्टाफका लागि अद्भुत जित मनाउन विशेष उपहार दिन चाहन्छन् तर सामान्य घडीहरू चाहँदैनन्।
त्यसैले पनि मैले हरेकको नाम लेखिएको गोल्डेन आईफोनको सुझाव दिएँ र उनलाई यो विचार मन पर्यो।” भर्खरै मात्रै मेसी फिफा वर्ष खेलाडी घोषित भएका छन् । उत्कृष्ट खेलाडी हुने होडमा ३५ वर्षीय मेसीले फ्रान्सेली फरवार्डद्वय केयलिन एमबापे र करिम बेन्जेमालाई पछाडि पारे ।
मेसीले सर्वश्रेष्ठ पुरुष खेलाडीको उपाधि लगातार दोस्रोपटक जितेका हुन् । मेसीको कप्तानीमा अर्जेन्टिनाले कतार विश्वकप २०२२ को उपाधि जितेको थियो । मेसीले २०२१–२२ मा क्लब र देशका लागि ४९ खेलमा २७ गोल गरेका थिए ।
लगातार दोस्रोपटक उपाधि जितेपछि मेसीले लामो समयदेखिको सपना पूरा भएको र यो साथीहरुको सहयोगमा सम्भव भएको प्रतिक्रिया दिएका छन् । अर्जेन्टिनी कप्तान मेसी अहिले पेरिस सेन्ट जर्मेन (पीएसजी) का फरवार्ड हुन् ।
