१० चैत, काठमाण्डौ ।
नेपाल प्रहरीको महानिरीक्षक (आईजी)मा वसन्तबहादुर कुँवरको बढुवा भएको छ। शुक्रबार बसेको मन्त्रिपरिषद् बैठकले कुँवरलाई आईजीमा बढुवा गर्ने निर्णय गरेको हो। योसँगै कुँवर नेपाल प्रहरीको ३० औं आईजी बनेका छन्। एआईजीहरु टेकप्रसाद राई, दीपक थापा, श्यामलाल ज्ञवाली र किरण बज्राचार्यलाई पछि पार्दै कुँवर आईजीमा बढुवा भएका हुन्।
अर्घाखाँचीका कुवँर पहिलो नम्बरमा एआईजी बढुवा भएका थिए। एआईजीको फुली लगाएको दुई दिनमै उनी आईजीमा बढुवा भएका हुन्। ३० वर्षे सेवा अवधिका कारण हालका आईजी धिरज प्रताप सिंह आजबाट अनिवार्य अवकाशमा जाने भएपछि रिक्त आईजी पदमा कुँवरलाई बढुवा गरिएको हो।
आईजीमा बढुवा भएका कुँवर डीआईजी बढुवा हुँदा पनि पहिलो नम्बरमै थिए। उनी पूर्व महान्यायाधीवक्ता तथा गण्डकी प्रदेशको प्रदेश प्रमुख समेत भइसकेका बाबुराम कुँवरका सहोदर भाइ हुन्। कुँवरको कांग्रेसका नेताहरुसँग राम्रो सम्बन्ध रहेको बताइन्छ।
कांग्रेसकै नेताहरुको जोडबलमा उनी आईजीमा बढुवा भएका हुन्। मधेस प्रदेश प्रहरी प्रमुख भएर काम गरेका कुँवरले काठमाडौं उपत्यका अपराध अनुसन्धान कार्यालयको समेत जिम्मेवारी सम्हालिसकेका छन्। नेपाल प्रहरीको केन्द्रीय प्रवक्ता भएर काम गरेका कुँवरले डीआईजी हुँदा कार्य विभागमा रहेर पनि काम गरिसकेका छन्।
एसपी हुँदा नुवाकोट लगायतका विभिन्न जिल्लामा रहेर उनले काम गरेका छन्। उनी २०५१ साल चैतमा प्रहरी निरीक्षकको रुपमा प्रहरी सेवामा प्रवेश गरेका थिए। ११ महिने छोटो कार्यालय पूरा गरी प्रहरी महानिरीक्षक (आईजी) धिरज प्रताप सिंह आजबाटै ३० वर्षे सेवा अवधिका कारण अनिवार्य अवकाशमा जाँदैछन्।
गत वैशाख १८ गते आफूभन्दा डेढ वर्ष सिनियर एआईजी विश्वराज पोखरेललाई पछि पार्दै आईजी भएका सिंहको कार्यकाल भने विवादरहित भने बन्न सकेन। हालका आईजी धीरजप्रताप सिंहसँगै उनका ब्याची एआईजीहरु सहकुल थापा, दिवेश लोहनी, उत्तमराज सुवेदी ३० वर्षे सेवा अवधिका कारण चैत १० गतेदेखि अनिवार्य अवकाशमा जानेछन्।
प्रहरीको नयाँ महानिरीक्षकका लागि ५ जना अतिरिक्त महानिरीक्षक (एआईजी)हरुमा पहिलो पटक महिला किरण बज्राचार्य पनि प्रतिस्पर्धीमा रहेकी थिइ । तर नेपाल प्रहरीको इतिहासमै पहिलो पटक महिला प्रहरी अधिकृत बज्राचार्य आईजी बन्नबाट भने बन्चित भएकी छिन् ।
