१६ भदौ, काठमाण्डौ ।
नेकपा एमालेमा कुनै पनि बेला विस्फोट हुन सक्ने भन्दै प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले दुई दिन अघि दिएको अभिब्यक्तिप्रति एमालेका नेताहरुले जवाफ फर्काएका छन् । एमाले उपाध्यक्ष विष्णु पौडेल, महासचिव शंकर पोखरेलले आज एकैस्वरमा प्रचण्डलाई एमालेको भविष्यवाणी गर्ने अधिकार नभएको टिप्पणी गरेका छन् ।
शनिबार एमालेको लुम्बिनी प्रदेश अधिवेशनको उद्घाटन कार्यक्रममा पौडेलले एमालेको विषयमा भ्रम फैलाएर आफू बलियो बन्ने सपना नदेख्न पनि आग्रह गरेका छन् । गत बिहीबार सुर्खेतमा आयोजित समाजवादी मोर्चाको कार्यक्रममा प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले एमालेभित्र धाँजा फाटेको, नेता कार्यकर्ताको ठूलो पंक्ति हैरान भएको र कुनै पनि बेला विस्फोट हुने बताएका थिए ।
सोही भनाईप्रति लक्षित गर्दै पौडेलले भने, ‘अवसरवादीहरु एमालेलाई कमजोर बनाउन सके आफू बलियो भइएला भन्ने सोचेर भविष्यवाणी गर्दै हिंडेका छन् तर एमालेको भविष्यवाणी गर्ने अधिकार अरुलाई छैन ।’ पौडेलले अगाडि भने, ‘विगतमा पनि एमालेललाई कमजोर मात्र हैन समाप्त पार्न प्रयास गरिएको थियो तर एमालेले ती सबै प्रयासलाई परास्त गरेको हो ।
’ उपाध्यक्ष पौडेलले प्रदेश अधिवेशनलाई लिएर महासचिव पोखरेल र आफ्नो नाम जोडेर गुटको लडाई भनेर प्रचार गरिएको तर कुनै गुट नरहेको बताए । ‘शंकर पोखरेल र मेरो गुट छैन, रंगीन समाचारबाट तरंगित नहुनुहोला’, पौडेलले भने, ‘गुटबन्दी मुर्दावाद पार्टी एकता जिन्दावाद ।’
उनले नीति र विचारमा एमालेभित्र कुनै विमति नरहेको दावी गर्दै विवाद छ भन्ने कुरा पानीको फोका मात्रै भएको बताए । उनले १० औँ महाधिवेशनबाट निर्वाचित अध्यक्ष केपी ओलीको नेतृत्वमा एमाले एकतावद्ध रहेको बताए । यस्तै महासचिव शंकर पोखरेलले पनि माओवादीमा पहिरो जान जरुरी रहेको बताए ।
प्रचण्डले एमालेमा पहिरो जान लागेको भन्दै गरेको टिप्पणीप्रति टिप्पणी गर्दै पोखरेलले यस्तो भनेका हुन् । उनले भने, ‘पहिरो एमालेमा होइन पहिरो माओवादीमा जान जरुरी छ ।’ महासचिव पोखरेलले लुम्बिनी प्रदेशमा विवाद गराएको भन्ने प्रचार गराएर पार्टीलाई कमजोर बनाउन खोजिएको आरोप पनि लगाए ।
उनले आफू र विष्णु पौडेलका बीचमा विभाजनको हल्लालाई अधिवेशनले मिथ्या सावित गराउन प्रतिनिधिहरूलाई आग्रह गरे । अध्यक्ष केपी ओलीको नेतृत्वमा एमाले एकताबद्ध रहेको उनले दाबी गरे । पोखरेलले कसैको सहाराबिना २०८४ मा एमालेको एकल सरकार बनाउने गरी लाग्न कार्यकर्ताहरूलाई आग्रह गरे ।
