९ कार्तिक, एजेन्सी ।
आइफोन निर्माता कम्पनी एप्पल इंक विश्वको सवैभन्दा धेरै बजार पूँजीकरण भएको कम्पनी बनेको छ । यसको बजार पूँजीकरण २६ खर्ब डलरमाथि उक्लिएको छ । पछिल्लो समय कम्पनीको सेयरमूल्य प्रतिकित्ता १७१ डलर ९७ सेन्टमा पुगेको छ। यो सबैभन्दा धेरै बजार पूँजीकरण हुने विश्वको पहिलो सूचीकृत कम्पनी बनेको छ ।
आइएफोन र ल्यापटप प्रडक्टको विक्री लोभलाग्दो भइरहेकै समयमा लगानीकर्ताहरुमाझ एप्पलको शेयरको माग बढेको छ । जुनको शुरुमा कम्पनीले बजारमा ल्याएको भिजन प्रोले पनि बिक्री बढाउने अपेक्षा चुलिएको छ । कम्पनीले फोल्डेबल आइप्याड पनि बजारमा ल्याउने तयारी गरिरहेको छ ।आगामी वर्षदेखि फोल्डेबल आइप्याडको उत्पादन सुरु गर्ने योजना एप्पलको छ ।
रसिया युक्रेन युद्ध र इजरायल हमास युद्धले एप्पलको शेयर मूल्यमा घटबढ भइरहेको छ । तापनि विश्वबजारमा उसका उत्पादनहरुको माग भने घटेको छैन । बुधबार न्यूयोर्क स्टक एक्सचेञ्जमा अन्य हाई–टेक कम्पनीको सेयरमूल्य पनि बढेको थियो । सन् २०१८ को अगष्टमा एप्पलको बजार पूँजीकरणले पहिलो पटक १० खर्ब डलर पार गरेको थियो ।
त्यसको ठ्याक्कै २ वर्षपछि अर्थात् सन् २०२० को अगष्टमा बजार पूँजीकरण २० खर्ब डलर माथि उक्लियो । सन् २०२२ को जनवरीमा बजार पूँजीकरण केही क्षणका लागि ३० खर्ब डलर पार गरेको थियो । तर त्यसयता शेयरमूल्य घट्न थालेपछि बजार पूँजीकरण पनि दबाबमा आइरहेको छ ।
यस्तै एप्पलपछि दोस्रो स्थानमा बिल गेट्सको माइक्रोसफ्ट कर्पोरेसन रहेको छ। कम्पनीको बजार पूँजीकरण २५ खर्ब ३० करोड डलर पुगेको छ। तेस्रो स्थानमा साउदी अरेबियाको आयल कम्पनी अरामको रहेको छ। यसको बजार पूँजीकरण २१ खर्ब डलर माथि रहेको छ। चौथो स्थानमा भने अल्फावेट इंक (गूगल) छ। गुगलको बजार पुँजीकरण १५ खर्ब डलरभन्दा माथि रहेको छ ।
