२७ कार्तिक,काठमाण्डौ ।
नेपाल सरकारले सामाजिक सञ्जल टिकटक बन्द गर्ने निर्णय गरेको छ । आज बसेको मन्त्रिपरिषद बैठकले टिकटक बन्द गर्ने निर्णय गरेको सरकारको प्रवक्ता एवम् सञ्चार तथा सूचना प्रविधि मन्त्री रेखा शर्माले जानकारी दिइन् । टिकटकबाट सामाजिक सद्भाव विगार्ने काम गरेकाले त्यसलाई बन्द गर्ने निर्णय गरिएको हो ।
मन्त्री शर्माका अनुसार टिकटक बन्द गर्ने निर्णय तत्काल कार्यान्वयनमा जानेछ, त्यसका लागि कुनै डेडलाइन तोकिएको छैन् । ‘टिकटक बन्द गर्ने निर्णय कार्यान्वयनमा जान प्राविधिक रुपमा केही समय लाग्ला तर तत्काल बन्द गर्ने निर्णय भएको छ,’ मन्त्री शर्माले भनिन्, ‘त्यस सम्बन्धी आवश्यक व्यवस्था सञ्चार मन्त्रालयले मिलाउने छ ।’
यसअघि कर्मचारीहरु समेत कार्यालयमै बसेर टिकटक बनाउन थालेपछि सरकारले रोक नै लगाएको थियो । निजामती कर्मचारीले कार्यालय पोसाकमा टिकटक बनाए मन्त्रालयले उनीहरुमाथि कारबाही गर्ने निर्णय गरेको थियो । प्रहरीले समेत प्रहरी पोशाकमा टिकटक बनाए कारबाही गर्ने निर्णय वमोजिम प्रहरी कर्मचारीहरुलाई कारबाही समेत गरेको थियो ।
गत साता मात्रै टिकटकका समाग्रीबाट हैरान बनेको नेपाल सरकारले टिकटक एपका अन्तर्राष्ट्रिय प्रतिनिधिहरुसँग छलफल गरेको थियो । टिकटकमा प्रकाशन तथा प्रसारण हुने गैरकानूनी सामग्री स्वतः हट्ने व्यवस्था मिलाउन सरकारले आग्रह गरेको थियो । टिकटक दुरुपयोग गरेर हालिने यस्ता सामग्रीलाई हटाएर शान्ति सुव्यवस्था र सामाजिक सद्भाव कायम राख्न सहयोग गर्न आग्रह गरिएको गृह मन्त्रालयले जनाएको थियो।
दोषीउपर कानुन बमोजिम कारवाही गर्न नेपाल प्रहरीको साइवर व्युरो लगायत सरकारी निकाय र सिंगापुरस्थित टिकटकको कार्यालयबीच सहकार्य बढाउने सहमति पनि भएको थियो । छलफलबाट टिकटकमार्फत सामाजिक सद्भाव बिगार्ने, घृणा तथा विद्वेष फैलाउने, विशिष्ट व्यक्तिहरुको मानमर्दन गर्ने, जातीय, धार्मिक, सामाजिक सद्भाव बिगार्ने र अश्लील खालका गतिविधि तथा सामग्रीहरु हटाउन र त्यस्ता कार्य गर्ने व्यक्तिहरु पत्ता लगाई कानूनी कारवाहीको दायरामा ल्याउन सहज हुने भन्ने निष्कर्षमा पुगेको सरकारले अहिले आएर टिकटक नै बन्द गरिदिएको छ ।
टिकटक विभिन्न देशमा बन्द गरिएको छ । अमेरिकामा अधिकांश राज्यमा टिकटक बन्द छ । पश्चिमा राष्ट्रहरुले सेमत टिकटकबाट राष्ट्रिय सुरक्षामा खलल पुगेको बन्दै बन्द गराएका छन् ।
