३ पुष,काठमाण्डौ ।
लगातार छैटौँ दिन आज मंगलवार पनि शेयर बजार बढेर हरियाली छाएको छ । शेयर बजार परिसूचक नेप्से आज ४५ दशमलव ९८ अङ्कले बढेर दुई हजार एक सय छ दशमलव ४८ विन्दुमा पुगेको छ । नेप्से गएको साउनयता पहिलो पटक २१ सय विन्दुभन्दा माथि पुगेको हो ।
आज सबै समूहको शेयर उकालो लागेकोमा उत्पादन र होटल समूहको शेयर उच्च अङ्कले बढेको छ । आज ११ वटा कम्पनीको शेयर १० प्रतिशतले बढेर सकारात्मक सर्किट लागेको छ । समग्रमा बजार बढेको दिन आज सिद्धार्थ इन्भेस्टमेन्ट ग्रोथ स्किमको शेयर भने सात प्रतिशतभन्दा धेरैले ओरालो लागेको छ ।
आज बजार बढे पनि कारोबार रकम भने हिजो सोमवारभन्दा घटेको छ । आज एक करोड ६४ लाख कित्ता शेयर पाँच अर्ब ९८ करोड ४६ लाख रुपैयाँमा कारोबार भएका छन् । सबैभन्दा धेरै शिवम् सिमेन्टको ३७ करोड ४३ लाख र सोल्टी होटलको शेयर २८ करोड ७३ लाख रुपैयाँमा किनबेच भएको छ ।
पुस लागे यता मात्रै सेयर बजार ११०.३७ अंक वृद्धि भएको छ । जुन तीन दिनको बढोत्तरी हो । मंसिर २० गते परीक्षण गरेको १८३० को विन्दुबाट बजारले उकालो लय समाएको छ । पछिल्लो ९ वटा कारोबार मै नेप्सेले २७७ अंकको फराकिलो फड्को मारिसकेको छ । योपटक बजारमा ठूलो रकम पनि भित्रिएको छ ।
५७ करोडसम्म सीमित भएको दैनिक किनबेच सोमबार झन्डै ७ अर्ब पुग्यो । जुन वर्षदिन यताकै सबैभन्दा बढी हो । मंगलबार पनि करिब ६ अर्ब हाराहारी छ । राष्ट्र बैंकको पहिलो मौद्रिक समीक्षापछि बजार झनै तेजीले वृद्धि भइरहेको छ । राष्ट्र बैंकले बैंक दर र पोलिस दर घटाएर ब्याजदर सस्तिने प्रष्ट संकेत गरेको हो ।
साथै पुसका लागि बैंकहरुले पनि निक्षेप दर घटाए । जसले ब्याजदर अझै घट्ने निश्चित छ । समीक्षामार्फत सेयरधितो कर्जामा कायम १५० प्रतिशतको जोखिम भार पनि १२५ प्रतिशमा झारेको हो । यसले लगानीकर्ताको मनोबल ह्वातै बढेको जानकारहरु बताउँछन् । यो बीच बजारको लयलाई प्रभाव पार्ने अनुमान गरिएको मर्जर र एफपीओमा लाग्ने करको विवादले पनि कुनै असर गरेन । जसले गर्दा बजारको वृद्धि दिगो हुने विश्लेषण भइरहेको छ ।
