१७ पुष,एजेन्सी ।
रेड सीमा युद्धको अवस्था सृजना भएको छ । यमनको हुथी समूहले अमेरिकी नौसैनिक सेनाले ‘रेड सी’मा आफ्ना १० लडाकु मारेको जनाएको छ । अन्तर्राष्ट्रिय जलक्षेत्रमा एक व्यवसायिक जहाज अपहरण गर्न खोजिरहेका लडाकुलाई अमेरिकी नौसेनाले मारेको हुथीको दाबी छ ।
हुथी सेनाका प्रवक्ता याह्या सारियाले एक बयानमा अमेरिकी सेनाले हुथी विद्रोहीसँग सम्बन्धित तीन डुंगामा आक्रमण गरेको बताएका छन्। प्रवक्ताले अमेरिकाले यो अपराधको नतिजा भोग्ने चेतावनी दिएका छन् । यसबीच तनाव बढ्दै गएपछि इरानले पनि लालसागरमा युद्धपोत तैनाथ गरेको छ ।
इरानी राज्य मिडियाका अनुसार तेहरानले लालसागरमा युद्धपोत पठाएको छ र उसले लालसागर क्षेत्रमा द्रूत रूपमा सैन्यीकरण भइरहेकाले सो कदम चालेको हो । इरानी सेनाको आइरिस अलब्रोज ९४औँ नौसेना फ्लिटको एक हिस्सा लाल सागर पुग्नका लागि यमन नजिकै बाब अल मान्डेबस्ट्रेटको माध्यमबाट यात्रा सुरु गरेको छ ।
यो युद्धपोत मूलतः आधा शताब्दी अघि १९७९ को इरानी क्रान्ति अघि निर्माण गरिएको थियो । तर, अहिले यसलाई पुनर्संरचना गरेर थप आधुनिक बनाइएको अन्तराष्ट्रिय मिडियाहरुले जनाएका छन् । यसमा इस्लामिक क्रान्तिकारी गार्ड कर्पोरेशनको नौ सैनिक बलबाट अलग नौ सैनिक बलमा पुनः सामेल हुन चार वर्ष पहिले नयाँ लडाईं प्रणालीहरू जडान गरिएको छ ।
उता इरानका सुरक्षा प्रमुख अली अकबर अहमदियानले हुथी बिद्रोहीका उच्च वार्ताकार मोहम्मद अब्दुलसलामसँग भेटवार्ता गरेपछि सरकारी सञ्चार माध्यमले यो खबर बाहिर ल्याएको हो । तर इरानी अधिकारी र हुथी बिद्रोही नेताका बीचमा यो भेट कहाँ वा कहिले भएको हो ? भन्ने अझै खुलाइएको छैन ।
इरानी मिडियाले अहमदियनलाई उद्धृत गर्दै भनेको छ कि प्यालेस्टिनीहरूलाई समर्थन गरेको र इजरायलको पक्षमा उभिएकोमा हुथीहरूको इरानले खुलेर प्रशंसा गरेको छ । हुथी बिद्रोहीले इजरायलसँग सबन्धित भएका कार्गाे पानीजहाजमाथि हमला गरेको भन्दै अमेरिकाको नेतृत्वमा युद्धपोत तैनाथ गराएपछि इरानले पनि युद्धपोत लालसागरमा उतारेको हो । अमेरिकाले विगतदेखि नै इरानले हुथीलाई सहयोग गरिरहेको बताउँदै आएको छ ।
